TOP
  • Home
  • Amawulire
  • Minisita Mukwaya alabudde bassentebe ku nsimbi z'abavubuka

Minisita Mukwaya alabudde bassentebe ku nsimbi z'abavubuka

Added 3rd October 2018

Minisita w’ekikula ky’abantu, emirimu n’enkulaakulana, Janet Mukwaya ng’ali wamu ne ttiimu okuva mu minisitule balambudde ebibiina by’abavubuka ebizze bifuna ensimbi mu nkola ya YLP ssaako eby’abakyala ebyafuna ensimbi ez’okwekulaakulanya eza UWEP.

 Minisita Mukwaya ng'ayogera eri abakulembeze ne bammemba b'ekibiina ky'abakyala ekya Ffenna lye kkubo e Kyampisi. (EKif. Henry Nsubuga)

Minisita Mukwaya ng'ayogera eri abakulembeze ne bammemba b'ekibiina ky'abakyala ekya Ffenna lye kkubo e Kyampisi. (EKif. Henry Nsubuga)

Bano abatuukidde mu kafubo n’abakozi ba gavumenti ku disitulikiti y’e Mukono ssaako bannabyabufuzi abeeyawuddemu ebibinja ne batandika okutalaaga amagombolola ag’enjawulo ku Lwokubiri.

Ekibinja minisita Mukwaya kye yabaddemu kyatandikidde mu ggombolola y’e Kyampisi ng’eno ssentebe w’eggombolola Ibrahim Kabambwe yatandise na kulaga kunyolwa olw’okuba ng’okuva omwaka gw’eby’ensimbi 2014-2015 enteekateeka ya YLP lwe yayanjulibwa e Mukono, eggombolola enol we yasembayo okuganyulwa mu nteekateeka ng’emyaka egizze giddirira ebibiina by’abavubuka okuva e Kyampisi bizze bisuulibwa mu kasero.

Wabula ono yabadde tannammaliriza ssentebe w’abavubuka ku disitulikiti Abdul Mutesaasira n’amulya ekimu ng’agamba nti ebibiina by’abavubuka ebisinga ebyava mu ggombolola eyo ensimbi byazibulankanya oluvannyuma lw’okuba nga byali bya bantu buntu abaakozesa obukozesa abavubuka abalala okusobola okufunirako ssente.

“Era nzize nneenyigira butereevu mu kukwata bammemba b’ebibiina ebyo naye nga batutegeeza lunye nga bwe bataafuna ku nsimbi. Eky’ennaku abamu ku baakola olukujjukujju okunyaga ssente bakulembeze bannaffe era kati ne bwe tubayita mu nkiiko tebakyajja,” Mutesaasira bwe yannyonnyodde.

Minisita Mukwaya nga yeekebejja engatto ezikolebwa ekibiina ky'abakyala ekya Tukolere wamu eky'e Nama. (EKif. Henry Nsubuga)

Ne kalabaalaba w’enteekateeka ya YLP, Sultan Bagalaalina ng’asimbye mu mugongo gwa Mutesaasira yagambye nti ebibiina by’abavubuka ebyasinga okugotaanya enteekateeka by’ebyo ebyasookera ddala okufuna ensimbi mu mwaka 2014-15 bwe byategeeza ng’ensimbi ezo bwe zaabaweebwa ng’akasiimo k’okuwagira ekibiina kya NRM ne pulezidenti Yoweri Museveni.

Bagalaalina yalaze okunyolwa okulaba ng’ebibiina by’abavubuka mu disitulikiti endala okuli Wakiso ne Kampala ebyali bibulankanyizza ensimbi mu ngeri y’emu bbyo bwe baabiteekako amaanyi baagonda ne batandika okusasula naye ng’ab’e Mukono wadde nga babasibyeko ne mu makomera na buli kati bakyeremye.

Kigambibwa nti abamu ku bakulembeze mu bibiina ebyafuna ensimbi ku mulundi ogwo, abamu baazikozesa okwekubako enfuufu, abalala baawasaamu abakazi sso n’abamu okuli abava mu ggombolola y’e Kkoome baazikozesa okugoba ku bipapula ne bagenda ebweru w’eggwanga okukuba ebyeyo.

Ye ssentebe wa disitulikiti y’e Mukono, Andrew Ssenyonga yagalaze okunyolwa okulaba ng’ensimbi ezaali ziweereddwa abavubuka okwekulaakulanya n’okwejja mu bwavu ate bangi ku bano olw’okuzikozesa obubi zaabafuula baavu n’okusinga we baali nga kati ne bwe bakwatibwa ne basibibwa mu makomera tebalina gye bayinza kuziggya.

Wabula ye Mukwaya bano yabaanukudde n’agamba nti tayinza kukkiriza nti ensimbi z’abavubuka zabbibwa era n’abazibulankanya ne basigala nga bayinaayina.

Minisita Mukwaya ng'alambula ebiyumba by'embizzi e Kyampisi mu pulojekiti z'abakyala. (Ekif. Henry Nsubuga)

“Ebibiina bino byava ku magombolola nga bassentebe bakakasizza nga bwe biriyo era nti bammemba mwebali, n’abakozi ba gavumenti ku magombolola okuli abasituzi b’embeera n’abaami ab’amagombolola ne bateekako emikono. Sisobola kukkiriza nti ebibiina ebyo byali byampewo.  Njagala abakulembeze be bamu batwale obuvunaanyizibwa okunoonya abavubuka abo babanje ssente za gavumenti, bwe kinagaana mmwe mujja okuzisasula,” Mukwaya bwe yategeezezza.

Mukwaya yalambudde okusinga bibiina by’abakyala ebyafuna ensimbi mu nteekateeka ya UWEP ng’era bino byasangiddwa ng’ensimbi bye zaafuna ddala ziriko bye zaakola nga n’abamu bafunvubidde mu kuzisasula.

Mu ggombolola y’e Kyampisi Mukwaya yalambudde ebibiina okuli Ffenna lye kkubo Women’s Group abaagula ttenti n’obutebe nga kati bawola n’ensimbi, Women of Destiny Women’s Group ekirunda embizzi, Tukolere wamu women’s Group ekisangibwa ku kyalo Namubiru mu ggombolola y’e Nama ssaako eky’abavubuka kyokka ekya Misindye Victors Youth Group nga zino kyafuna obukadde 7 ezaali ez’okulunda enkoko.

Ssentebe waakyo, Jonah Buyinza yagambye nti oluvannyuma lw’enkoko okulumbibwa endwadde ne zifa, baasalawo obusente obutono bwe baali bafunye okubuzza mu kulunda embizzi ng’era waakiri zino zirina we zibatuusizza.

Yagambye nti baweza embizzi 37 nga n’ensimbi ze baafuna baakazzaayo obukadde 2.

More From The Author

Emboozi z’omuwandiisi endala

Emboozi endala

Fr. Kato nga bamwaniriza mu kigo ky’e Kamwokya.

"Musabire abakulembeze bamm...

KAABADDE kaseera ka ssanyu ate n’okunyolwa ku kigo ky’e Kamwokya, Abakristu bwe baabadde baaniriza Bwannamukulu...

Abakungubazi nga batunuulira ekifaanayi ky’omwana eyattiddwa.

Bawambye omwana ne bamutta

ABATEMU bawambye omwana ow’emyaka mukaaga ne bamutta mu bukambwe, omulambo ne bagwambulamu engoye. Rosemary Ngambeki...

Joseph Ssewungu (ku kkono) ne Latif Ssebaggala nga baliko bye babuuza minisita Jeje Odong (ku ddyo) ku lukalala lw’amannya g’abantu abatalabikako lwe yasomye mu Palamenti.

Ensonga z'ababaka 10 ezitan...

ABABAKA bawadde ensonga 10 lwaki tebamatidde lukalala olwayanjuddwa minisita w’ensonga z’omunda olulaga abantu...

Abaserikale nga batwala omulambo gw'omuwala.

Bagudde ku mulambo gw'omuwa...

ABATUUZE ku Kyalo Kakerenge mu Ggombolola y’e Gombe mu disitulikiti y’e Wakiso baguddemu ekyekango bwe bagudde...

Abatuuze nga baziika Ssali.

Amasasi ganyoose nga poliis...

Amasasi ganyoose nga poliisi y’e Wakiso egumbulula abatuuze abaaziikudde omulambo nga bagamba nti famire teyinza...