TOP
  • Home
  • Amawulire
  • Mmanerenda tebaamuganyizza kuyingira mwaka 2019: Bamusse

Mmanerenda tebaamuganyizza kuyingira mwaka 2019: Bamusse

Added 2nd January 2019

MMANERENDA abazigu bamulondodde ne bamutuga ng’anaatera okuyingira ewuwe e Bwaise mu kiro ky’okuyingira omwaka omupya.

 Omulambo gwa Kayemba ku mmotoka.

Omulambo gwa Kayemba ku mmotoka.

John Kayemba, abadde muwozi wa ssente (mannerenda) amanyiddwa ennyo mu Bwaise II mu Kampala, nga kuno agattako okukola obwa bbulooka bw'ettaka n'amayumba ne bizinensi y'okusuubula amanda.

Abazigu baamusse mu kiro ekyakeesezza Olusooka omwaka ng'eggwanga lyonna liri mu kubinuka olw'okumalako omwaka.

Abantu bangi tebaawulidde kanyoolagano kaabaddewo era beekanze mulambo ku makya.

Kigambibwa nti bwe yabadde addayo ewuwe, yagenze ku dduuka lya 'Mobile Money' e Bwaise n'aggyayo ssente ku ssimu. Kiteeberezebwa nti abaamulondodde baateeberezza nti alina ssente nnyingi olw'omulimu gw'okuwola ssente gw'abadde akola.

Omulambo baagusanze gwaziddwa ng'ensawo z'empale bazifudde ekiraga nti baagenze ne ssente.

Wabula ku dduuka lya 'Mobile Money' we yaggyiddeyo ssente baakizudde nga yabadde aggyeeyo emitwali 15 zokka (150,000/-) kyokka tekimanyiddwa oba yabadde n'ensimbi endala abazigu ze baagenze nazo.

Omwogezi wa poliisi mu Kampala n'emiriraano Luke Owoyesigyire yagambye nti abazigu baalondodde Kayemba ku ssaawa 5:00 ez'ekiro ekimalako omwaka 2018 bwe yabadde okumpi n'amaka ge agasangibwa mu Nakamiro Zooni mu muluka gwa Bwaise II.

Kayemba we baamuttidde, kinnya na mpindi ne poliisi y'e Nakamiro wabula tewali muserikale yavuddeyo kutaasa Kayemba.

N'okuggyawo omulambo poliisi kyagitwalidde essaawa nnamba ekyanyiizizza abatuuze.

Abatuuze bayongeddeko nti, ebimu ku bifo eby'obulabe mu kitundu kyabwe kuliko; omwala gwa Nakamiro Channel okuliraana we baatugidde Kayemba, ku kasaawe ka Nabukalu, ne mu kibangirizi kya katale k'abalimi aka Growers ne mu Namakula Zooni.

Baagambye nti okuva ku ssaawa 1:00 ey'akawungeezi, ababbi baba beetala nga banywerawo n'enjaga kyokka poliisi efaayo.

Ronald Kisekka muganda wa Kayemba yagambye nti, beetaaga bwenkanya mu kuttibwa kw'omuntu waabwe n'asaba poliisi ebeere nnambulukufu mu kunoonyereza ebawe ne lipooti.

Owoyesigyire yategeezezza nti poliisi yaggudddewo omusango ku fayiro nnamba SD:93/31/21/2018 okunoonyereza ne kutandikirawo okuzuula abazigu abasse Kayemba.

Omulambo gwasooseddwa mu ggwanika e Mulago oluvannyuma ne bagenda okuziika.

More From The Author

Emboozi z’omuwandiisi endala

Emboozi endala

Abaserikale nga bawaayo ebyambalo.

Aba SPC bawaddeyo ebyambalo...

ABASIRIKALE 200  abaateekebwawo okuyambako mu biseera by'okulonda bazizzaayo ebyambalo bya poliisi abamu  nga...

Aba NUP nga bawaga e Kamwokya.

Aba NUP si bamativu ku miso...

ABAKULEMBEZE b'ekibiina kya National Unity Platform (NUP) bavuddeyo ku misolo emipya egiteekebwateekebwa gavumenti...

Zaake ng'ayogera e Kamwokya.

Omubaka Francis Zaake awera

Omubaka Francis Zaake akiikirira munisipaali y'e Mityana era nga ye mukulembeze w'abavubuka mu NUP, alojjedde Bannakibiina...

Kayongo ng'annyonnyola.

Nkyali mukulembeze w'akatal...

Abadde ssentebe w'akatale ka St.Balikuddembe, Godfrey Kayongo ategeezeza nti akyali mukulembeze w'abasuubuzi b'ekibiina...

Abakugu nga balaga ekyuma ekifuyiira n'okutta obuwuka bwa Covid 19.

Bakoze ekyuma ekifuyiira n'...

Abakugu mu bya tekinologiya okuva mu ggwanga lya Romania nga bali wamu n'ab'ekitongole kya Good Care baliko ekyuma...