Felix Abura, omuserikale ku poliisi ya Jinja Road ye yattulukuse entuuyo nga bwe zikalaera y'abadde omujulizi owa 13 okulumiriza Kanyamunyu ne muganzi we Cynthia Munwangari mu musango ogw'okukuba omugenzi Kenneth Akena amasasi e Lugogo ku bigambibwa nti yakolobola mmotoka yaabwe.
Omulimu gwa Abura gwali gwa kugenda awaali ettemu e Lugogo okumpi n'ekibangirizi kya UMA n'ekibanda kya Malik n'akuba maapu y'ekifo.
Yazze ne mmaapu ng'eraga awaali ettemu n'ekifo mmotoka ya Kanyamunyu n'eya Akena we zaali kyokka maapu yabaddemu ebirumira.
Oluguudo awaali ekiweta, mmaapu tekiraga, awali ekyambuka nga tekiraga, teraga buwanvu bwali wakati w'ekibanda ky'emmotoka ne ku UMA n'ettemu we lyali ate era teyapima bbanga lyali wakati w'emmotoka ya Akena ne Kanyamunyu.
Yasoose kugamba nti mmaapu yagikuba kiro nga November 12, 2016 n'addayo nga November 14 yeetegereze bulungi kyokka yabikyusizza n'agamba nti waliwo eyamutegeeza nti alina omukyala eyalaba nga Kanyamunyu akuba essasi gwe yali agenze okunoonya.
Omulamuzi yamubuuzizza oba yaddayo okukuba mmaapu eyo oba yanoonya omukyala gwe baali bamugambye kyokka Abura yabuliddwa eky'okuddamu.
Bwe yabuuziddwa ensonga eyamulesaayo ebintu ebimu ku mmaapu yagambye nti yabyerabira.
