Poliisi ezudde emmundu egambibwa okukozesebwa mu bulumbaganyi obwakoleddwa ku Spice Supermarket.
Jun 28, 2022
Poliisi y’e Mukono, ng’eri wamu n’ekitongole ekikkesi n’aba Flying Squad baliko emmundu ekika kya AK47 gye bazudde mu kabuga k’e Nassuuti.
By Eric Yiga
Journalist @New Vision
Omwogezi wa poliisi mu Kampala n’emiriraano, Luke Owoyesigire ategeezezza ng’ebitongole bino bwe byakoze omuyiggo ku Mmande ne basanga emmotoka ekika kya Toyota Corona nnamba UAD 728Y mu masangazira ga Ham Mukasa ng’eyimiridde.
Mu kugyaza, baasanzeemu emmundu eyabaddemu amasasi asatu ng’ezingiddwa mu kiveera, ensawo bbiri ez’oku mugongo ng’emu erimu ebijjambiya, akambe ne makansi bbiri n’ebyuma ebirala ebikozesebwa ababbi n’ebintu ebibbe.
Emmotoka Eyasagiddwamu Emmundu Ng'eri Ku Poliisi E Mukono
Ono agamba nti ebizibiti bino biteeberezebwa okuba nga bye bimu ku bazigu bano bye bazze bakozesa mu bubbi bw’emmundu obugenda mu maaso mu disitulikiti eno. Mu kiseera kino okunoonyereza kukyagenda mu maaso ku bazigu bano nga waliwo n’abamu abaakwatiddwa.
Okusinzira ku nsonda ku poliisi e Mukono, waliwo n’abantu abalala abaakwatiddwa ekiro ekikeesezza olwaleero omuli ne Ramathan Kirumira 28, omutuuze ku kyalo Kitete Ggulu Ward - Mukono ne bamugatta ku William Mugalu ne Sam Mbogo abaakwatibwa ku Ssande.
No Comment