Balam bamwanirizza ku lwa Team MK e Mityana

Bya Luke Kagiri

ABAKULEMBEZE b’e Kassanda ne Mityana balangiridde nga bwe beeyunze ku kibinja ekitembeeta Gen. Muhoozi Kainerugaba, yeesimbewo ku Bwapulezidenti singa Pulezindeti Museveni aba avudde mu buyinza.

Ku Lwomukaaga, ekibinja kya Muhoozi ekya Team MK mu ttabi lya Greater Mubende (disitulikiti y’e Mubende n’eziriraanyewo) babadde mu tawuni e Mityana, gye baasiibye nga batongozza ettabi lyabwe.

Nga bakulembeddwa Balam Barugahare, baasookedde mu katale e Mityana gye bayogeddeko n’abasuubuzi n’oluvannyuma ne balya ekyemisana n’abakozi b’omu katale. Balugahare ng’atuuka e Mityana yawerekeddwako eyali Ssentebe w’ekibiina kya NRM owa Mityana Hajji Haruna Nziza n’abaali ba ssentebe ba disitulikiti okwabadde Deborah Kinobe ne Joseph Luzige.

Luzige ye ssentebe wa disitulikiti eyaakavaako nga yasikiddwa Patrick Mugisha owa NUP. Abalala abaabaddeyo kwabaddeko Abdu Muyimbwa, eyavuganyako ku bwassentebe mu kulonda okuwedde.