Omusaseredooti w'e Nairobi akutuse ava kwesanyusaamu ne muganzi we mu wooteeri

Bya Daphine Semakula

Omusaseredooti ow'emyaka 43 agambibwa okuyingira mu wooteeri ne muganzi we beesanyuseemu afiiriddeyo..

Rev Fr. Joseph Kariuki abadde akolera mu Kigo kya St. Peters Catholic e Ruai ye yafudde. Kariuki yali musaseredooti mu ssaza ly'e Nairobi era yali mulimi mu ssaza lye Mang'u, Kiambu .

Okusinziira ku lipoota ya poliisi eyalabiddwa olupapula lw’amawulire lwa The Standard,  Joseph Kariuki yagenze mu wooteeri ya Monalisa, Murang'a ku Lwomukaaga akawungeezi nga June 8, n'omukyala ow'emyaka 32 eyategeerekese nga Ruth Nduhi era abaagalana bano ne  basula ku wooteeri eno mbu nga beesanyusa.

Poliisi egamba nti Nduhi abadde mwagalwa wa Kariuki ate nga mukozi munne.

Wabula ku Ssande ku makya nga bali mu wooteeri, munnaddiini ono yafunye omusujja n’okubulwa amaanyi era embeera n’etabuka, ekyawalirizza muganzi we okunoonya obuyambi okuva mu bakozi ba wooteeri ne bamuddusa mu ddwaaliro.

Poliisi egamba baabategeezezza nti Kariuki mufu nga yaakatuusibwa mu ddwaaliro lya Kenol.

"Omulambo gwasangiddwa mu ntebe y'emmotoka ey’emabega ng'ekitundu kibikkiddwa essuuka ya wooteeri nga gubimbye ejjovu," lipoota ya poliisi bw'egamba mu kitundu.

Omulambo gutwaliddwa mu ddwaaliro lya Mater Hospital Mortuary, nga poliisi etandise okunoonyereza okuzuula ekyavuddeko okufa kwe.