Abakugu balabudde ku ndwadde olw’enkuba etandise

ABAKUGU mu nteebereza y’obudde balabudde Bannayuganda ku nkuba bikoco egenda okufudemba mu bitundu by’eggwanga eby’enjawulo nti egenda kuleeta ebizibu omuli endwadde mu bantu n’ebisolo wamu n’ebibamba ebirala.

Okusinziira ku kiwandiiko ekyafulumiziddwa ekitongole ekirondoola embeera y’obudde mu ggwanga ekya Uganda National Meteorological Authority, nga kiriko omukono gwa Bob Alex Ogwang akola ng’akulira ekitongole kino, enkuba egenda kutonnya nga ya maanyi nnyo okuva mu mwezi gwa September okutuuka mu December.

Amataba gagenda kuba mangi, obujama bweyongere, kiviireko endwadde nga kkolera, ekiddukano, omusujja gw’omu byenda n’endala okweyongera naddala mu bitundu bya Kampala n’ebitundu ebirimu omugotteko. Ensiri nazo zigenda kuzaala nnyo, olw’ensiko okukula amangu, n’amazzi okulegama, omusujja gw’ensiri gweyongere.

Okubwatuka kw’eggulu, embuyaga ey’amaanyi, omuzira, olufu, n’obumyanso nabyo bigenda kubeera bya maanyi nnyo, ekigenda okuvaako obubenje ku nguudo ne ku mazzi, ebizimbe okugwa, enguudo okwonooneka, emyala okujjula, ettaka okukulugguka, nga Bannayuganda balina okubyerinda.

Abalimi nabo balabuddwa ku nkuba ennyingi egenda okwonoona ebirime byabwe, naddala ebiteetaaga mazzi mangi, okukuluggusa ettaka eririmu ebiriisa ebirime ne bitasobola kukula bulungi, endwadde z’ebirime n’ebiwuka ebitawaanya ebirime bigenda kwongera okuzaala, ng’omulimi anafuna mu sizoni eno ateekwa okukola obutaweera.

Abalimi baweereddwa amagezi okukozesa ebigimusa mu nnimiro, okutema ensalosalo, okusimba ebirime ebyetaaga amazzi amangi okugeza omuceere, amayuuni n’ebikajjo naddala mu bitundu ebiregamamu ennyo amazzi, okulambulanga ennimiro buli kiseera okusobola okulaba ebiwuka n’endwadde ebirumba ebirime, okukoola ebirime mu budde, okukungula mu bwangu, enkuba ereme kwonoonera mmere mu nnimiro, n’ebirala.

Ekitongole era kyawadde Gavumenti amagezi okuteeka eddagala mu malwaliro kubanga omuwendo gw’abalwadde gugenda kweyongera. Gavumenti era erina okulondoola enguudo okulaba nga ziddaabirizibwa mu budde, amasomero n’amalwaliro nabyo birondoolwe okulaba nga biddaabirizibwa, kubanga bingi bigenda kwonoonebwa enkuba, ate kikose obuweereza eri abantu.