Abayizi n’abavubuka bagumidde enkuba mu misinde gy'okusimba emiti

Abayizi n’abavubuka bagumidde enkuba ne beenyigira mu misinde gy’okudduukirira okusimba emiti mu masomero

Abayizi b’amasomero okuli aga pulayimale, ssekendule ne yunivasite, abavubuka n’abakulembeze ku mitendera egy’enjawulo mu kibuga ky’e Mukono ne disitulikiti bagumidde enkuba ekedde okutonnya okwetoloola ebitundu bya Mukono eby’enjawulo bwe bajjumbidde emisinde egitegekeddwa n’ekigendererwa eky’okusonderamu ensimbi ez’okudduukirira omulanga gw’okusimba emiti mu masomero.

Eyali mmeeya Kagimu ng'akwasa omuwanguzi wa 10KM Frank Okello ebbaasa oluvannyuma lw'okumwambaza omudaali, ku kkono, James Muyonda ow'okubiri.

Emisinde gino gitegekeddwa abakulembeze okusingira ddala ab’abavubuka ku munisipaali y’e Mukono ne disitulikiti okuli kkansala w’abavubuka abalenzi ku disitulikiti, Lauben Ssenyonjo, ow’abavubuka abawala ku munisipaali, Margret Nattabi ssaako ekitongole ki Funga Pengo Development Initiative Africa.

Ng’ayogera, sipiika wa disitulikiti y’e Mukono, Betty Nakasi ategeezezza nti nga disitulikiti, baamala okuyisa ekiteeseo eky’okusimba emiti akakadde kalamba ku masomero okusingira ddala aga gavumenti n’ekigendererwa eky’okusiga ensigo ey’okukuuma obutonde bw’ensi nga bayita mu miti emito.

Ye sipiika wa Mukono Central Divizoni, Allan Mawanda akunze abavubuka n’abaana okukomya okwesuulirayo ogwa nnaggamba nga balaba abantu abakulu boonoona obutonde bw’ensi omuli okumala gatema miti n’abasaba basitukiremu balwanirire omulembe gwabwe ate n’ogulijja.

Mawanda asabye ab’ekitongole ekitwala eby’ebibira mu ggwanga ekya National Forestry Authority (NFA) okukomya okubeera ba kirumirampuyibbiri nga be bamu abalaga nti balwanirira okukuuma ebibira n’okubizzaawo ate ng’era be beenyigira mu kubiwa abagagga ababitema ne babisimbamu kalitunsi ky’agambye nti kittattanye nnyo obutonde bw’ensi.

“MWewale okutunula obutunuzi nga mulaba abantu bayonoona obutonde bw’ensi, nga tusitukiddemu okusimba emiti, ate tulwanirire egyo egyasimbibwa adda tugikuume gireme kumala gasaanyizibwawo naddala egyo egiri mu bifo eby’olukale gamba ng’ebibibira, entobazzi n’ebirala.

Eyaliko meeya w’ekibuga ky’e Mukono, George Fred Kagimu, eyali ssentebe wa disitulikiti y’e Mukono, Andrew Ssenyonga bakunze abakulembeze ku mutendera ogw’eby’obufuzi n’abakozi ba gavumenti buli omu okukola ky’asobola okulaba ng’ayambako ku mulamwa guno ogw’okulwanirira obutonde bw’ensi ogutandikiddwako olwaleero.

Kkansala Ssenyonjo agambye nti omulembe guno gususse okubeera gu ngalobunani ogutunula obutunuzi ng’ebintu eby’omugaso eri eggwanga omuli n’ensonga enkulu ey’obutonde bw’ensi bityoboolebwa.

Abavubuka nga bakola dduyiro nga tebannagenda kudduka

“Kye kiseera tusitukiremu tulwanirire n’okukuuma omulembe gwaffe nga bajjajjaffe bwe baakuuma n’okulwanirira ogwabwe ne tutuuka olwaleero ng’embeera eringa bwe biri kati oba nga bwe byali gye buvuddeko ng’abantu bassekinnoomu tebannatandika kwezza buli kimu omuli n’ebirira nga tebalina kulumirirwa Uganda yaffe,” bw’agambye.

Ategeezezza nga bwe bagenda okusimba emiti okusingira ddala egy’ebibala mu masomero olwo basobole okukuba ebinyonyi bibiri n’ejjinja limu omuli okuyamba abayizi okulya ebibala ne babeera balamu ate nga n’obutonde bw’ensi nabo bukuumiddwa.

Emisinde gino giddukiddwa mu mitendera ebiri okuli abadduse kkiro mmita ttaano nga gino giwanguddwa Johnson Kyakoonye okuva ku ssomero lya Panorama S.S, Habibah Namagambo owa St. Peter’s Mixed S.S, Francis Kirabira owa St. Peter’s ne Robert Kyokwijuka owa St. John’s S.S Kauga. Mercy Nasiche owa Bishop’s East P/S ye mwana omuto asinze banne. Ye Paul K. Ssempeebwa ye musajja asinze obukulu ku b’etabye mu misinde gino.

Abayizi bana okuva ku yunivasite ya UCU e Mukono beefuze emisinde egya kkiro mmita 10 nga bano be babadde mu bifo okuva ku kisooka okutuuka ku ky’okuna olwo abalala ne balyoka bagoberera. Bano kuliko; Frank Okello akulembedde, James Muyoda ow’okubiri, Edward Mukasa ne Innocent Ayeko. Abawanguzi baweereddwa emidaali n’ebirabo eby’enjawulo.