Abaana emitwalo 40 bafa lwa ndwadde ezeekuusa ku mazzi n’obucaafu

ENDWADDE eziva ku mazzi amacaafu n’obujama ze zimu ku zisinga okutigomya
abaana abato.

Era okusinziira ku lipooti eyafulumizibwa mu March w’omwaka guno okuva mu kitongole ky’Amawanga Amagatte ekivunaanyizibwa ku by’obulamu by’abaana, okusoma, amazzi amalungi n’obuyonjo, ekya United Nations Children Emergence Fund (UNICEF), endwadde eziva ku mazzi amacaafu n’obujama zitta
abaana abali mu 400,000 buli mwaka.
Dr. Annet Nakirulu, omusawo eyakuguka mu kujjanjaba abaana e Mulago, agamba nti, ku ndwadde ezitawaanya abaana olw’obucaafu n’okunywa amazzi agatali mayonjo kutera okubeerako; ekiddukano eky’omusaayi, embiro eza bulijjo, omusujja gw’omu byenda, kkolera n’endala.
EBIJAMAWAZA AMAZZI
Ying Olweny Lamu, kamisona okuva mu kitongole ky’ebyobutonde n’amazzi mu ggwanga avunaanyizibwa ku kusaasaanya amazzi mu byalo (Rural Water Department -
Ministry Water and Environment) annyonnyodde engeri amazzi naddala aga payipu gye
gafuukamu ag’obulabe.
Agamba nti, bwe babeera tebannata mazzi kugenda mu bantu kugakozesa, amazzi ga payipu gassibwamu eddagala eritta obuwuka okutangira abantu okufuna endwadde z’obucaafu nga omusujja gw’omu byenda, kkolera, ekiddukano ky’omusaayi n’ebirala. Wabula obuzibu we bujjira, amazzi gano bwe gatuuka mu payipu, zimanyi okwabika, ezimu zifuna enjatika, endala abalima enguudo bazitema ne zijjako obutuli era nga mu butuli buno obuwuka obulwaza abantu mwe bufunira ekyanya ne buddamu okuyingira
mu mazzi gano.
“Abantu abamu bata kazambi n’ayita ku payipu z’amazzi ezaayabise n’aziyingiramu amatigga g’okulwaza abantu ne geeyongera”, Ying Lamu bwe yayongeddeko.
Ate payipu ne bwe zibeera teziwummuse, olumu abantu ebintu bye bakozesa
okulembekeramu amazzi gano okuli ebidomola, obugalani, ebikopo, n’ebirala, by’ebibeera ebicaafu. Era eno y’ensonga lwaki bakubiriza abantu okufumbanga
amazzi g’okunywa wadde gabeera ga payipu ge baataddemu edda eddagala eritta obuwuka obulwaza endwadde.
Ensonga y’okubeera n’amazzi amayonjo, mu bungi era nga gatuuka ku buli muntu, yassiddwaako essira ne mu lukuηη aana lw’amawanga g’olukalu lwa Afrika
olw’ebyobulamu olwayindidde mu kibuga Marrakech e Morocco wiiki
ewedde.
Era ab’ekitongole ky’amawanga amagatte ekivunaanyizibwa ku by’obulamu bw’abaana, okusoma, amazzi amalungi n’obuyonjo, ekya United Nations Children Emergence Fund (UNICEF) kyawabudde nti, gavumenti zongere embavu mu mateeka g’eggwanga agaluηη amya ku mazzi n’enkyukakyuka mu mbeera y’obudde n’obutonde bw’ensi.
Wabula n’abantu ku bitundu byabwe nabo balina okwenyigiramu okulaba amazzi
gabeerawo n’okukuumibwa.
Era Ying Lamu w’ategeerezza nti, Gavumenti bwe basima nayikonto oba nga bazimbye enzizi z’emidumu n’ebirala, abatuuze b’oku byalo kwe bazizimbye nabo kibakakatako okuzikuuma nga nnyonjo, n’okuzitangira eri ekintu kyonna ekiyinza okuzoonoona.