PASS PLE: Quiz ya Bukedde eyinda ku ssomero lya Kitante

Bya Lawrence Kizito

EMPAKA za Quiz ezitegekebwa olupapula lwa Bukedde, abayizi ba P7 mwe babbinkanira mu kwanukula ebibuuzo ku bintu bye bazze basoma, za leero ku Kitante Primary School.

Zitabiddwamu amasomero okuva mu Uganda yonna, kw’ossa abasomesa abakugu okuva mu masomero ag’amaanyi mu Kampala n’emiriraano abagenda okulungamya enteekateeka eno.

Empaka zaatandika ku ssaawa 2:00 ez’oku makya, ziggwe ssaawa 10:00 ez’akawungeezi, abayizi basobole okutambula okudda ku masomero gaabwe ng’obudde bukyali.

Abayizi n’amasomero aganaasinga, baakufuna ebirabo omuli okuwangula ebikopo, kw’ossa ettu okuva mu ba Prestige Margarine.

Michael Mukasa Ssebowa, omukungaanya w’olupapula lwa Bukedde ow’oku ntikko yagambye nti abayizi bagenda kusindana mu masomo agabuuzibwa mu bigezo eby’akamalirizo (PLE), okuli: English, Science, Maths ne Social Studies, kyokka ng’amasomero ageewandiisizza gokka ge gagenda okukkirizibwa okwetaba mu mpaka zino, ate agateewandiisizza go gaakulaba bulabi ebigenda mu maaso.

Yagambye nti ebyobulamu bigenda kukolebwako eddwaaliro lya Garry Holmes Hospital erisangibwa e Maganjo, ate nga n’ebyokwerinda biri gguluggulu nga byakukolebwako Poliisi ya Uganda.

Abasomesa abagenda okulungamya empaka zino bali 12, okuva mu masomero ag’amaanyi, nga balina obukugu n’obumanyirivu mu busomesa, era nga be bakuteekerateekera ebibuuzo bya PASS PLE ebifulumizibwa mu lupapula lwa Bukedde buli lwa Mmande n’Olwokuna.

Abayizi n’abasomesa bagenda kufuna omukisa okwogeramu n’abasomesa bano n’okubabuuza ebibuuzo ebikwata ku ngeri y’okweteekerateekeramu ebigezo bya PLE.

Ebibadde mu Quiz bigenda kuzannyibwanga ku Bukedde TV 1 buli Lwamukaaga okumala omwezi mulamba, kiyambe abayizi abataasobodde kubeerawo nabo okugabana ku ebyo ebyaliyo, ate n’abali mu P6 kibayambe okweteekateeka nga bukyali.

Quiz nga ziwedde, Bukedde agenda kusigala ng’afulumya ebibuuzo bya PASS PLE, buli lwa Mmande n’Olwokuna okutuusa ng’ebigezo bya PLE biwedde.