Museveni alagidde abasomesa ba ssaayansi ku yunivasite bongezebwe omusaala

PULEZIDENTI Yoweri Kaguta Museveni alagidde ku kwongeza omusaala abasomesa ba sayansi mu matendekero aga waggulu .

Okwogera bino Museveni abadde ku mukolo gw'okujaguza emyaka 20 e Kololo akakiiko akalondoola emirimu mu matendekero aga waggulu ka National Council for Higher Education (NCHE) gye kamaze nga kaweereza eggwanga .

Mu kaweefube w’okulaba nga amasomo ga ssayansi , tekinologiya n'okubala bitumbulira mu ggwanga , Pulezidenti Museveni alagidde emisaala gy’abasomesa amasomo gano gyongezebwe okusobola okubakuumira  ku mirimu wamu n’okusikiriza abalala okusomesa.

Pulezidenti Yoweri Kaguta ne mukyalawe Janet Kataha wamu n'abamu ku bakungu mu minisitule y'eby'enjigiriza nga balambula emidaala gya yunivasite ez'enjawulo

Katunguka nga era ye mumyuka wa ssenkulu wa Kyambogo yunivasite ategeezezza nti gavumenti efubye okusiga ensimbi mu by’okuzimba enguudo , amalwaliro n’ebizimbe byayo ebirala wabula ate yunivasite zo zisanga obuzibu okuyingiza wamu n’okukuuma abakozi baabwe naddala mu masomo g'obwayinginiya n'okukuba pulaani ky'agamba nti kino kyandikosa emirimu gya gavumenti kuba tejja kuba na basomesa basomesa bayizi balala.

Okusobola okugonjoola okusoomooza kuno , Museveni yalagidde abasomesa abasomesa amasomo gano okwongezebwa emisaala mu bunnambiro okusobola okwenkanankana ne bali mu mirimu gy’obwannanyini .

Ye Minisita w’Ebyenjigiriza Janet Kataha Museveni, asabye abakulira yunivasite okusomesa ebyo ebituukira ddala n’obwongo abayizi bye babeera basobole okussa mu nkola ebibasomeseddwa olwo nabo basobole okukulaakulanya ebitundu gye babeera .

Pulezidenti Museveni ng'abuuza ku mumyuka wa Makerere yunivasite Barnabus Nawangwe.