Ababbooda ababadde beeyita abaserikale ku Mini Price bakwatiddwa ne batuuyaana

Abagoba ba bodaboda  babiri gabamyuse oluvannyuma lwa poliisi okubakwata nga beeyita abaserikale ne batuuka n'okukozesa kkaadi ( Warrant card) ze babadde balaga nti bo baserikale abawadde emirimu baleme kukwatibwa nga bakola emirimu gyabwe ne boogera n'abazibafunira .

Moses  Tuhimbaze ne Diag Ssekizivu be bakwatiddwa poliisi oluvannyuma lw'okusangibwa ne kkaadi  ze bakolerera ze babadde balagayo nti baserikale bawone ebikwekweto by'okukwata pikipiki zaabwe.

Ssekizivu Ne Tuhimbaze Nga Bali Ku Poliisi Ya Cps Mu Kampala.

Amyuka omwogezi wa poliisi mu Kampala n'emirirwano Luke Owoyesigyire yagambye nti okukwata ababbooda bano kyaddiridde omu ku bo abaserikale ba KCCA nga November 2, 2023 okukwata Tuhimbaze  ppikippiki ye nga agisimbye mu kifo ekitakkirizibwa n'abalaga densite ( Warrant card) okulaga nti muserikale wabula ne bamubuusabuusa ne basalawo okumutwala ku poliisi ya Mini Price okubaako bye bamubuuza.

Yagambye nti olwatusizza Tuhimbaze ku poliisi abaserikale baliko ebibuuzo bye baamusoyezza ku kkaadi okuli akafaananyi ke wamu ne nnamba y'obuserikale ( Force Number ) gye yabadde nayo n'akkiriza nti si muserikale era n'ayogera ne banne abalina kkaadi zino.

Yategeezezza nti abaserikale baagenze ne bakwata Ssekizivu naye n'akkiriza nti si muserikale era kkaadi zino zaabaweebwa bannaabwe okuli Musiraamu ne Wycliff wabula abadduse .

Yagambye nti Tuhimbaze ne Ssekizivu baabuulidde abaserikale nti ekyabafunyisa kaadi zino okulaga nti baserikale kwekwewala pikipiki zaabwe okuyoolebwa mu bikwekweto poliisi ne KCCA bye bakola nga bwe basanga emisanvu babadde baziragayo ne babakela ne bayitawo wabula nga ku mulundi guno akakodyo kaabwe tekaakoze.

Yagasseeko nti abaakwatiddwa bagguddwako omusango gw'okweyita kye batali era nga ne kkaadi zaabwe zaaweerezeddwa ku kitebe kya poliisi e Naguru okuzeekebejja nga bwe balinda okwongerako emisango emirala.