Omuyizi ow'emyaka 9 essomero gwe lyalemedde olw'ebbanja lya fiizi afiiridde mu kisulo

Bya Florence Tumupende

Poliisi y'e Lwengo ekutte n'eggalira dayirekita w’essomero lya COROH CHILDREN’S FOUNDATION P/S erisangibwa mu tawuni kanso ye Kyazanga mu disitulikiti ey’e Lwengo wamu n’akulira essomero kw'ossa ne bbaasa lwa kulemera omuyizi abadde abanjibibwa ebisale by’essomero n'afiira mu kisulo.

Abakwatiddwa kuliko:  Chris  Matovu 38, Ssekatawa Julius ne Kagenda Muzafaru nga bano be bagambibwa okulemera omuyizi Joel Ojuma ow’emyaka 9 ng’abadde agenda mu kibiina p.4 era ng' azaalibwa mu disitulikiti ya Arua .

Omugenzi asangiddwa ng' omulambo gwe gulengejja ku kawuzi  k’engatto akasibiddwa waggulu ku katanda kw'asula .

Kigambibwa nti essomero lino lyawummuza abayizi nga November 24,2023 wabula ne liremera abayizi basatu olw’obutamalaayo bisale by’essomero.

Muganda w’omugenzi eyabadde azze okukima mutoowe Alinda Kasifa  olwatuuse ku ssomero lino,bbaasa w’essomero lino, Kagenda Muzafaru yagaanyi okumuwa mugandawe nga tamazeeyo fiizi era ono azzeemu okumuwuliza ng'afudde. 

Omusasi waffe atuuse mu maka agagambibwa nti omugenzi gy'abadde alina ow’oluganda lwe n'asanga nga olumbe lutwaliddwa mu disitulikiti ya Arua era be tusanzeeyo bwe balamye kkamera zaffe ne baggalawo enju.

Ssentebe wa Byuma Zone, Moses Kabandeebe   yennyamidde olw’ekikangabwa ekigudde mu kitundu kye n’akissa ku bwavu obususse mu bantu ekivuddeko abazadde okusuula abaana ku masomero.

Bo abazadde bavumiridde ekikolwa ky’omukulu w’essomero n’akakiiko ke eky’okulemera omuyizi  ekivueko omuyizi okwetuga ne basaba gavumenti erongoose amasomero gaayo agavaako abazadde okugaggyamu abaana baabwe nga banoonya omutindo.

Omwogezi wa poliisi mu bendobendo ly'e Masaka,  ASP Jamadah Wandera akakasizza okukwatibwa kw'abano n'ategeeza ng' okunoonyereza bwe kutandise bw'atyo n'asaba bannannyini masomero okugoberera ebiragiro ebyabaweebwa minisitule y’ebyenjiriza.