Bamulekwa b'omugenzi Lwomwa basonyiye abasse kitaabwe ne babakwasa Katonda
BAMULEKWA b'omugezi Lwomwa Yinginiya Daniel Bbosa Kakeedo eyakubiddwa amasasi agaamusse ku Ssande akawungeezi ng'ayingira amakaage beegasse ku nnyabwe ne basonyiwa abasse kitaabwe ne babakwasa Katonda abalamule.
Bamulekwa ba Lwomwa nga boogera mu kusabira kitaabwe.
Bya Peter Ssuuna
BAMULEKWA b'omugezi Lwomwa Yinginiya Daniel Bbosa Kakeedo eyakubiddwa amasasi agaamusse ku Ssande akawungeezi ng'ayingira amakaage beegasse ku nnyabwe ne basonyiwa abasse kitaabwe ne babakwasa Katonda abalamule.
Bano nga bakulembeddwaamu Shadrach Luggya basinzidde mu kkanisa y'Omusumba Polof. Simeon Kayiwa eya Christian Fellowship e Namirembe mu kusabira omwoyo gw'omugenzi ne batendereza okwagala n'okusonyiwa kitaabwe kw'abadde akulembeza nabo ne basonyiwa abatemu.
Nnyabwe nnamwandu Gladys N. Bbosa naye olwakutte omuzindaalo n'ayongera okusonyiwa abaamutidde bba era yasuubizza n'okutandikawo ekibiina ky'abadduukirira abatalina mwasirizi nga bba kye yayagalanga naye ng'afudde takituukirizza.
Polof. Kayiwa yabasabidde essaala wabula n'avumirira abasalira abagenzi omusango.
Yatenderezza omugenzi okwagala kw'abadde nakwo eri eddiini n'ategeezezza nti yabeegattako mu kkanisa eyo mu mwaka gwa 1981.
Lwomwa yattiddwa abatamanyangamba abaabadde babagalidde emmundu ne bamusindirira ebyasi ebyamuttiddewo ng'ayingira amakaage e Lungujja Kikandwa zzooni mu Lubaga, wabula omutemu omu naye n'attiddwa omulala akyapooca na bisago e Mulago nga bw'alinda okukunyizibwa.
Milly Naluwenda, nga muwandiisi wa Kkooti ya Kisekwa naye yakwatiddwa abeebyokwerinda e Lungujja ayambeko ku kuzuula ebeenyigidde mu ttemu lya Lwomwa nga kino kyakakasiddwa omwogezi wa Poliisi mu Kampala n'emiriraano, Patrick Onyango.