Mwegendereze ababawa ssente okubaggya ku mulamwa - Ambasada

AMBASADA w’amawanga ga Dubai mu Uganda, asabye abayizi ba yunivasite Abasiraamu okukomya okukkiriza ababakozesa nga baagala okutuukiriza ebigendererwa byabwe olwa ssente.
Yagambye nti abantu bangi bwe balaba abavubuka naddala abasoma ku yunivasite bamanya nti kyangu okubaggya ku mulamwa ne babakozesa bye baagala olw’okwagala
okufuna eby’amangu ne beerabira nti buli ali obulungi ku nsi Allah y’asalawo.
Bino Ambasada Abdalla Hassan yabyogeredde ku kitebe kya ofiisi ya ssentebe wa NRM mu ggwanga e Kyambogo ku Lwokusatu bwe yabadde n’akulira ofiisi eno Hajati Hadijah Namyalo nga babakwasa ebintu ebikozesebwa mu kusiibulukuka ne mu bulamu obwabulijjo omwabadde sukaali, omuceere, butto, entende, ehhaano, obuwunga ne kalonda omulala.
Byaweereddwaayo ekitebe kya UAE mu Uganda ekikulemberwa Abdallah Hassan. Ambasada Hassan yasuubizzaabayizi okubafunira sikaala beeyongereyo basome mu mawanga g’Abawalabu n’okubafunira emirimu.
NAMYALO AWADDE AB’E NABISUNSA EBY’OKUSIIBULUKUKA
Hajati Namyalo yeeyongeddeyo ku ssomero lya Nabisunsa Girls mu Kampala nga naye gye yasomera n’abawa eby’okusiibulukuka omwabadde amatooke, ennyama, wootameroni, omuceere ne sukaali.
Yasabye abawala okwekuumira ku mulamwa ogwabatwala mu ssomero kubanga ebbanga lye bagenda okumalamu lya mugaso nnyo ku bulamu bwabwe obw’omu maaso.
Mu ngeri yeemu ne meeya wa Kampala Central, Salim Uhuru Nsubuga yakubye Abasiraamu b’omu Kampala akaama okunywerera ku Allah kubanga y’alina obugagga bwe banoonya. Omukolo guno gwetabiddwaako ne Supreme Mufuti wa Uganda, Sheikh Muhammed Galabuzi.