Ettendekero lya Buganda Royal likyali mu kiyongobero olw'okufiirwa abayizi baabwe mu kabenje

EMBEERA ekyali ya kiyongobero ku ttendekero lya Buganda Royal Insitute of Business and Technical Education Mengo oluvannyuma lw’abayizi bana okufiira mu kabenje ka mmotoka bwe babadde bagenda ku bbiici ku kabaga akategekeddwa ettendekero lino.

Akabenje kano kaaguddewo ku Lwomukaaga ku ssaawa 9:00 ez’akawungezi ku kyalo Musinde ku lwe Garuga oluvannyuma lwa mmotoka Toyota Rumion UBH582S okulemererwa omugoba waayo eyabadde agezaako okuyisa mmotoka endala nayingirira Fuso ya soda eyabadde esimbye ku mabbali gw’oluguudo.

Mmotoka eno yabaddemu abayizi mukaaga nga baana ku bano okuli Ausi Ssempebwa abadde yakatikirwa mu by’emisono mu January w’omwaka guno nga yeyabadde avuga, Hassan Ssentongo abadde asoma ebyamazzi, Joseph Mayanja ne Rogers Tukunadane ababadde basoma ebyamasannyalaze bafiiriddewo ate bannabwe okuli Kevin Taremwa ne Frank Ssekanjako nebaddusibwa mu ddwaliro e Kisubi nga bakli bubi.

Abaana nga bali mu kiyongobero

Abagenzi bamu ku bayizi b’ettendekero lino ababadde bagenda ku kabaga ku biici ya Katomi Kingdom Resort Garuga ku lw’Entebbe okwesanyusa nga baniriza banaabwe ab’omwaka ogusooka’’Fresher’s Party’’.

Avunaanyizibwa ku by’ensoma mu ttendekero lino Apollo Kaggwa ategeezezza nga bwe bafunye eky’ekango ekyamaanyi era n'asaasira abazadde abafiiriddwako abaana baabwe munjega eno.

Agambye nti basobodde okukwatagana ne famiire z’abagenzi okukola ku by’okuziika nga Hassan Ssentongo ne Ausi Ssempebwa baazikiddwa leero ate Joseph Mayanja ne Rogers Tukundane bakuziikibwa leero ku Mmande.

Eggulo bazadde ba bagenzi bakedde kugenda ku gwanika e Mulago okujjayo emirambo gy’abaana baabwe ng’abamu betwayogeddeko nabo okuli Expert Kalyesubula Kojja wa Rogers Tukundane yayogedde ku mugenzi ng’abadde omwana ow’empisa ate omuntu mulamu.

Ian Kato omu mikwano gy’abagenzi ategeezezza nti olunaku luno baludde nga balw’esunga era ng’ojjeko ekya kabaga kabanaabwe ab’omwaka ogusooka babadde balina okujagulizaako obuwanguzi bw’okuwangula empaka z’eby’obuwangwa.

Wabula ono agamba nti ettendekero lyataddewo bbaasi nya okutambuza abayizi kyokka banaffe bano nebasalawo okupangisa mmotoka yaabwe betambuze era bebatubadde mu maaso kyokka twagenze okutuuka ku lwe Garuga ng’emmotoka yaabwe etomedde wano essanyu ffena lyetwabadde nalyo weryakomye netudda mu miranga.

Omuyizi Roger Tukundane kati mugenzi

Omwogezi wa poliisi y’ebidduka mu ggwanga Micheal Kananura yakakasizza akabenje kano nategeza nga bwekavudde mu kuvugisa ekimama.Mmotoka ezakoze akabenje zatwaliddwa ku poliisi ye Kisubi.

Omuyizi Mayanja Kati Mugenzi