Miss Bukedde azzeeyo ku ssomero lya St. Andrew Kagwa Gombe High school Kawaala ne bamwaniriza ng'omuzira

MISS BUKEDDE, 2024, Praise Kibuka amanyikiddwa nga Praise Wisdom azzeeyo ku ssomero lya St. Andrew Kagwa Gombe High school Kawaala gy’asomera oluvannyuma lw’okutuuka ku buwanguzi bayizi banne n’abasomesa ne bamwaniriza wakati mu mizira n’enduulu olw’ekitiibwa kye yabaweesa.

Praise Wisdom ng’asoma siniya y’akusatu, yatikkirwa engule y’obwa Miss Bukedde ku lunaku lwa paasika e Kansanga ku wonder world, oluvannyuma lw’okuwangula banne abalala basatu bwebaatuuka ku fayinolo

Praise nga bamwanirizi ku ssomero

Ono yayolesa ekitone bwe yayimba oluyimba lwa Juliana Kanyomoozi olwa Kanyimbe n’aleka ng’abasazi b’empaka n’abantu abalala abajja bamunyeenyeza mutwe.

 Yawangula ekyapa ky’ettaka okuva mu Njovu Estate Developers e Nansana n’obukadde butaano obwamuwebwa Bukedde abategesi b’empaka zino.

Kati ono azzeeyo ku ssomero okukakkalabye emisomo gye oluvannyuma lw’okuwumulamu akaseera akamala ng’eno bayizi banne bamwaniriza mu mizira.

Ku ssomero atuukiddewo mu mmotoka ekika kya Prado, era yasanze abayizi n’abasomesa baakunganye dda okumulindirira ne basimba enyiriri ebbali ne bbali olwo ye n’atambulira wakati nga bwawuubirako nga bwebayaayaana okumukwatako mungalo n’okumugwako mu kafuba era bangi obwedda bagamba tebagenda kunaaba olw’okukwatako omuzira wabwe mu ngalo.

Praise Kibuuka ng'ayanirizibwa akulira essomero Kyewalabye Male

Dayirekita w’essomero Kiwalabye Male mu ssannyu eringi agambye nti beesiimu okulaba ng’omwana owabwe Praise Wisdom yazeeyo n’engule y’obwa Miss Bukedde naategeeza nti kibawadde amaanyi okwongera okuwagira ebitone kubanga y’enkola yabwe.

Ye Praise Wisdom yasiimye katonda eyamuwa eddoboozi eryamuyambye okutuuka ku buwanguzi era ne yeebazza Bukedde olw’okusaawo empaka zino okwo gattako buli muntu eyamubeererawo okutuuka ku buwanguzi buno naddala taata we.