Mufti Mubajje asuubizza ku matendekero g’Obusiraamu

MUFTI wa Uganda Sheikh Shaban Mubajje yeeyamye okukunga Abasiraamu okwongera okuzimba yunivasite mu bitundu by’eggwanga ebitali bimu.
Mubajje era agambye nti ayagala watandikibwewo amatendekero gayambe
ku Bamaseeka okwongera okubangulwa.
Yagambye nti ensonga eno Pulezidenti Museveni yamutegeeza dda nga bw’ali omwetegefu okuyambako okutandikawo amatendekero gongere okubangula
Bamaseeka abali ku madaala agenjawulo.
“Buli lwe tusisinkana ne Pulezidenti ambuuza oba tulina amatendekero agongera
okubangula ku Bamaseeka, ensonga eno nkulu nnyo gye tulina okutunulamu mu bwangu,” Mubajje bwe yategeezezza. Okwogera bino, yabadde aggalawo olusirika
olwamaze ennaku essatu ng’abakulembeze b’Obusiraamu e Kampalamukadde
batema empenda okulaba engeri yunivasite ya Islamic Call University gy’ekulaakulanyizibwa. Mu lusirika luno, olwategekeddwa Polof. Badru Balunywa mu kifo kye ekisangibwa e Garuga ku lw’e Ntebe, baateesezza ne ku ky’okukyusa erinnya lya
yunivasite eno. Polof. Balunywa yasabye gavumenti ekendeeze ku misolo gy’eggya ku matendekero ’obwannannyini.