Pulezidenti Museveni asiimye Muhoozi okwagala ensi ye

PULEZIDENTI Museveni atenderezza mutabani we Gen. Muhoozi Kainerugaba era omuduumizi w’eggye lya UPDF olw’okubeera mwoyo gwa ggwanga ekimuyambye okubeera omuweereza omulungi.
Yasinzidde mu kabaga akaategekeddwa mu maka g’obwapulezidenti e Ntebe nga bajaguza olwa Muhoozi okuweza emyaka 50, n’ategeeza nti mutabani we okuyingira amagye kyava mu mutima gw’okwagala gw’alina era kye kimuyambye okutumbula
embeera y’abajaasi.
Muhoozi yawezezza emyaka 50 nga April 24, 2024 ng’omukolo gwetabyeko maama we, era minisita w’ebyenjigiriza Janet Museveni n’aba ffamire yaabwe . Museveni yeebazizza Katonda olw’okusobozes mutabani waabwe okuweza emyaka 50 nga bakyali balamu.
Yagambye nti Muhoozi yakula musajja wa maanyi ng’ayagala nnyo okuweereza
eggwanga era ng’atya Katonda. Mu mutima gw’ekizadde yatonedde Gen. Muhoozi ente 100. Gen. Muhoozi yeebazizza Katonda olw’okumuwa obulamu obulungi n’agamba
nti akaseera kano kabeera kakulu okujaguza olw’abantu abamubeereddewo mu bulamu bwe.
Yeebazizza bazadde be, baganda be, mukyalawe Charlotte n’abaana baabwe olw’obuwagizi bwe baamuwadde. Mu ngeri ey’enjawulo yeebazizza bagenero b’amagye n’abaserikale ba UPDF bonna abeewaayo okuweereza eggwanga. Yalaze nti alina ffamire bbiri okuli ffamire ye ate endala ya UPDF.
Mukyala wa Muhoozi, Charlotte yatenderezza bba olw’okutebenkeza eggwanga n’okutumbula embeera z’abaserikale. Yagambye nti abaali banyooma bba, bazze
bakkiriza mpola nti ddala musajja mukozi