Amazzi gasengudde abatuuze e Luzira

Abatuuze ku kyalo Panda PL e Luzira basattira oluvannyuma lw’okulumbibwa amazzi agatandise okubasengula mu mayumba gaabwe nga n'abasigaddemu basula ku tebukye.

Bino biddiridde enkuba eyatonnya gyebuvuddeko nga eno y’eviiriddeko amazzi gano okwanjaala nga kiteeberezebwa okuba nga kiva ku kubooga kw’ennyanja Nalubaale ebaliraanye mu kitundu kino. 

Abantu nga basengula ebintu

Ssentebe w’ekyalo kino, Joseph Tomusange ategezezza nga gyebuvuddeko bwebataalina buzibu bwonna bwekuusa ku mazzi ku kyalo kino kyokka nga balabira awo nga amazzi gabalumbaganye oluvannyuma lw’enkuba okutandika okutonnya.

Ayongeddeko nti  baalina bizinensi nnyingi ku kyalo nga n’abatuuze bakola bulungi sente nebekulakulanya kyokka nga mu kiseera kino embeera eddiridde nnyo oluvannyuma lw’amazzi gano okukulukusa emmaali yabwe n’ebimu ku bintu ebyasigalamu nebyonoonekera mu mayumba olw’okubulwa webabissa.

Tomusange alaze obwennyamivu  olw’amazzi gano ageyongera buli olukya n’ategeeza nga mu kiseera kino bwebawangaalira mu bunkenke olw’okubulwa ekiddako.

Amayumba nga gali mu mazzi

Awanjagidde abakulembeze mu kitundu ne minisitule y’ebigwatebiraze okusitukiramu babaduukirire nga bwekikolebwa mu bitundu ebirala ebifuna obwetaavu.

Kyokka anokoddeyo n’embeera y’ebyobulamu eyongedde okukaluba okuva amazzi gano lwegaabasalako nga omuntu nebw’aba alwadde basanga obuzibu okumutuusa mu ddwaliro mu budde.

Jesca Mutesi nga mutuuze mu kitundu kino agamba nti embeera y’amazzi okubayingirira ebazizza nnyo emabega nga n’ebifo byonna byebaali bakoleramu emirimu amazzi gaabikulukusa nga kati bkyasobeddwa.

Ayongeddeko nga bw’asanze okusomoozebwa okw’amaanyi kubanga mu kiseera kino akyali nnakawere nga yetaaga okwerabirira mu ngeri ey’enjawulo kyokka nga kati talina wajja nsimbi kubanga n’emirimugye gyafa