Ekikadde kinyumidde abadigize e Nabweru

KIKADDE Komanda ng’ono ye Julius Ssebwato owa Bukedde Fama, akubye abadigizi abanyumirwa emiziki egiyiseeko ku myaka endongo n’abaleka nga basaba anko.

Ssebwato yabadde Nabweru ku kisaawe ku wiikendi mu kivvulu kye eky’ekikadde mu Binyaanya eky’omulundi ogw’okubiri ng’ono yaccamudde abadigize n’akatagga.

Omutaka Sebwato ng'abuuza ku badigize

Yayambadde engoye ez’abadde ziggyayo omulamwa gw’e kikadde; okwabadde sseruwale ya bbolobotomu, ekisaati ky’omweso nasaako sasupenda, ku mutwe nateekako akakofiira ak’edda ate wansi mu bigere n’alinnya mu bukalabanda.

Yazze ne leediyo ekika kya kaseti mweyabadde ateeka teepu n’akuba abantu myuziki wa wambuuza, Kasonko n’endala era ono obwedda azina obuzina obwedda wamma abantu ne banyumirwa.

Oluvannyuma yannyonyoogedde ecuuma n’afukuula abantu omuziki omukadde gweyabadde ayambazza ebinyaanyanyaanya era olw’abatadde n’abakwasa bassaabanyaanyanyaanya Suna Ben ne Mbaziira Tonney nabakuba ekinyaanyanyaana.

Ssebwato yeebazizza abamuwagidde okwabadde Bukedde, aba Century property Real Estate (U) abawaddeyo ekyapa ky’ettaka ekyawanguddwa omu kubannamukisa ababadde mu kivvulu n’abalala.

Suuna Ben ng'ali n'abadigize

Abalala abaccamudde bantu kwabaddeko meeya Mathias Walukagga, Chris Evans, Master Weed eyayimba njagala kugendako Juba, Kazibwe Kapo, Stelah Kayaga okwo gattako bakazanyirizi nga bakalabalaba b’omukolo babadde Bruno Betty ne MC Bukutu aba Bukedde.

Ronald Ssebutiko ku lwa Bukedde, yasiimbye abadigize olw’okuwagira Ssebwato kubanga bwebamuwagira babeera bawagidde Bukedde era n’abasaba okwongera okuwagira Bukedde n’abakozi baayo bonna