Okufa kwa Dr. Asadi Lutale kubakubye encukwe

OKUFA kwa Dr. Assad Sentongo Lutale abadde omusomesa wa Yunivasite era omukiise ku lukiiko olufuzi olwa Uganda Muslim Supreme Council kulese Abasiraamu mu kiyongobero.
Dr. Sentongo nga ye musika w’omugenzi Hajji Asadu Lutale eyali DA wa Mpigi n’oluvannyuma n’abeera RDC okumala ebbanga ddene, yafudde kibwatukira nga kigambibwa nti yafudde bulwadde bwa Puleesa. Dr. Sentongo yabadde “Director of Africa Programs at the Auschwitz Institute for Peace and Reconciliation (AIPR)”. Mufuti Sheikh Ramadhan Mubajje abikidde eggwanga n’Obusiraamu okufa kwa Dr. Sentongo n’agamba nti abadde mpagi luwaga mu Busiraamu olw’obuyivu bw’abadde yatuukako mu by’ensi
n’eddiini ye ey’Obusiraamu. Dr. Sentongo waakuziikibwa leero ku ssaawa10:00 e Butambala.