Bukedde yanteekamu empisa n'entereeza n'ennyambala - Ssewungu

OMUBAKA Joseph Gonzaga Ssewungu (Kalungu West) yeenyumiririza mu BUKEDDE olw'empisa n'entiisa gye yamuteekamu ey'okuba omwegendereza mu bifo by'abeeramu n'ennyambala.

 Agamba nti:

Nkyogera lunye nti, siyinza kumala gagenda mu buii kifo kubanga nkimanyi abasasi ba BUKEDDE bali buli wamu nga ne bwe mbeera ku Palamenti nneegendereza si kulwa nga nfulumira mu basinze okwambala obubi.

Emirundi egisoba mu ena, Bukedde gy'empandiiseeko ng'omu ku babaka abakyasinze okuteesa mu Palamenti kinnyongeddeko nnyo era empapula ezo awali emboozi eyo naziwanga ne nziteeka mu nju okukola ng'ekijjukizo.

Nsiima BUKEDDE olw'okumpandiikangako emirundi gye sibala, ku bunkenke bwe nzize nteekawo mu byenjigiriza okulaba nga byongerwako omutindo.

Bukedde yayongera omutindo ku mpandiika y'Oluganda entongole, okubeera omwangu okusoma, okubeeramu amawulire okuva mu buli nsonda n'obukugu bw'abawandiisi, abasasi n'abasunsuzi okulowoolezanga omusomi buli kadde ku kiyinza okumumukuumirako. 

Omugguukiriro gwa Bukedde n'ensengeka yaagwo kimu ku bimuleetera okukwata omubabiro ne mwettanira mangu. Ng 'omusomesa, natwala eddaala okulondoola amasomero agettanira empapula z'amawulire mu konsitituwensi yange ne nzuula ng'agasinga gagula BUKEDDE n'ekigendererwa eky'okuggyamu PASS PLE akoze ekinene mu kuyamba abayizi okukola obulungi.

Naye kye nneebuuza y'engeri BUKEDDE gy'ekikolamu okuba ng'esobola okukuŋŋaanya amawulire wansi eyo mu byalo n'ebimu omuntu by'ayinza okuba nga tawulirangako. “Simanyi bwe mukikola! Sijja kukulimba ne muwandiika eggulire ku muntu nga terivumye, terivvodde, wabula nga lirimu obukakafu bwonna!” Ssewungu bwe yeewuunyizza. 

Oluganda olukozesebwa, empandiika n'ensengeka y'emboozi za BUKEDDE binnyumira nnyo engeri gyendi musomi wa ‘Literature'.

Buli mboozi nsobola okugisoma ne ngiddinnana olw'obunyuvu, kubanga abanyumya oba abawandiisi b'emboozi basembereza ddala omusomi ku ekyo kye bawandiiseeko era buli lwe banyumya emboozi yonna nga bwe yabadde buli lw'ogisoma eyongera kukula.

Buli lwe ntuuka we nsalira enviiri nga bandeetera BUKEDDE nga ntandika okubasomera emboozi eziba zisinze okucamula abantu. BUKEDDE alina abantu b'awadde essanyu b'amanyidde ddala obulungi, abamufunyeemu abakazi nga basooka kulaba bifaananyi byabwe n'empisa ze baali baagala mu babeezi. 

Omuko ogusinga okunnyumira gwe gw'Ebyemizannyo naddala ebibuuzo ebiteekebwamu ebikuleetera okwefumiitiriza ate ng'eno bw'oyiga. Bannayuganda mwongere okulanga mu BUKEDDE asobole
okusigala ng'atuweereza kubanga katabo kanyuvu,kayigiriza nga n'ekisinga obukulu ebbeeyi yaako ekagula 1,000/- ya wansi so ng'ate omuntu ky'ayigamu kibeera kya lubeerera.