Abeebyokwerinda bakutte 7 n’enjaga

ABEEBYOKWERINDA e Mbale nga bakulembeddwa omumyuka wa RCC owa Northern Division, Yahaya Were bakoze ebikwekweto mwe bayooledde abavubuka musanvu ku bigambibwa okuba abamenyi b’amateeka mu bitundu by’e Nakaloke.

Abakwate baasangiddwa n’ebbaafu z’enjaga bbiri ssaako amafuta g’ennyonyi n’ebiragala ebirala. Were yagambye nti ebikwekweto bino tebigenda kulekera awo okutuusa ng’obumenyi bw’amateeka bulinnyiddwa ku nfeete. Were yagambye nti balagidde poliisi ekole ku fayiro zaabwe batwalibwe mu kkooti bavunaanibwe kubanga baasangiddwa lubona n’ebizibiti.
Ebikwekweto bigenda kubunyisibwa mu Mbale yonna nga bafuuza obumenyi bw’amateeka ssaako okulaba ebikolwa by’okuteega abantu ne babatta, okubanyaga, okukwata abakazi, okunyakula obusawo, okumenya amaduuka n’amayumba. Abakwate baatwaliddwa ku poliisi y’e Nakaloke ng’okunoonyereza bwe kugenda mu maaso.