Ziizino enteekateeka za Quiz ya Bukedde eneebaawo ku Lwokutaano luno

OLWOKUTAANO lwa wiiki eno, abayizi ba P7 lwe bagenda okwetaba  mu mpaka za Pass PLE Quiz ezigenda okubayamba okufuna obukodyo obusembayo okuyita  eby’akamalirizo.
Avunaanyizibwa ku byenjigiriza mu Bukedde, Miriam Nambatya  yagambye nti zinaagenda okuwera  essaawa 2:00 ez’oku makya ku Lwokutaano nga October 4, 2024
emiryango gijja kuba gigguddwawo egy’essomero lya Kitante Primary School awagenda okubeera empaka zino.
Nambatya yagambye nti amasomero agawerako gaamuweerezza ebifaananyi n’obutambi nga beegezaamu era balinze lunaku battunke. Okuyingira kwa bwereere eri abayizi bonna.
Abayizi n’amasomero aganasukkuluma ku malala gajja kuweebwa ebirabo ebyenjawulo nga babasiima olw’okwolesa omutindo.
Akulira ebyokutunda amawulire ga Vision Group, Bruce Byaruhanga yagambye nti abayizi ba P.7 bonna bayitiddwa babangulwe mu bintu ebitera okubakaluubirira okumala olunaku lulamba.
Okuyingira n’ebyokulya byonna bisasuliddwa Bukedde, ng’amasomero kye gasigalizza  kwe kutambuza abayizi okubatuusa e Kitante. Abasomesa abakugu okuva mu masomero agasinga okuyisa abayizi bajja kubaawo okubangula abayizi nga babawa obukodyo. Abayizi era bajja kuba n’omukisa ogubuuza ebibuuzo ebitera okubawa obuzibu nga babyanukula.
Byaruhanga agamba nti kino bakikola okulaba ng’abayizi ababadde basoma akatabo ka Pass PLE ate tebafuna kukaluubirizibwa kwonna ku byakamalirizo.