Amasomero agenda okwetaba mu Quiz ya Bukedde beesunga kusitukira mu buwanguzi

AMASOMERO agagenda okwetaba mu Quiz ya Bukedde olupapula buli limu liwera okusitukira mu buwanguzi.
Victoria Nanyonga owa P7 okuva ku Sky Nursery and Primary School Kalungu mu Bukomansimbi agamba yeesunga okuwangula empaka zino n’okuyiga by’atamanyi.
Richard Kiganda naye omuyizi ku Sky Nursery and Primary School naye yeesunga kulaba ng’essomero lye aliwangulira empaka zino n’okuyiga obukodyon obupya ng’ayongereza ku bw’abasomesa be bwe bamuwa.
Mu ngeri endala yeesunga okusisinkana ku akulira Vision Group, Don Wanyama, amukwateko ne mu ngalo kubanga amwegomba nyo.
Ate abayizi ba Happy Times Infant School Makandwa e Kajjansi  nabo beesunze Quiz ya Bukedde.
Patricia Nalubega yagambye nti agenda kwetaba mu mpaka zino era mwetegefu okwanukula ebibuuzo byonna ebigenda okumubuuzibwa. Samuel Mulungi Kiggundu naye nga muyizi yagambye nti amanyi obuwanguzi bwabwe. Ate abayizi ba Ssesanga Nursery and Primary School mu Kisenyi zooni e Bwaise I bagamba nti engule baakugyetikka omwaka guno.
Abayizi okwabadde; Jonathan Yiga, Mumbejja Ndagire ne Keira Akoth abaasangiddwa ku ssomero baagambye nti beeteeseteese okuvuganya era bajja kuwangula. Baagambye nti omwaka oguwedde baawerekera ku bannaabwe abaali basoma P7 ne balaba engeri gye baddamu ebibuuzo. Omusomesa waabwe, Moses Kagobya yagambye nti guno omulundi gwakutaano nga beetaaba mu mpaka zino era omwaka oguwedde baakoma
ku mutendera oguddirira ogw’akamalirizo wabula nga baafuna ebirabo ebirala omuli emijoozi ne satifiketi ekyabasanyusa nga kati beesunga kwetikka ngule. Ate abayizi ba Busega Preparatory School e Busega bagamba nti abasomesa baabwe baabawadde byonna ebyetaagisa okusobola okuwangula empaka zino.
Abayizi bano okwabadde
Anisha Namirembe, Margaret Nakaweesi, Treasure Ssemakula, Charles Treasure Ategeka ne Larry Mbonye abamu ku bagenda okwetaba mu mpaka zino baategeezezza nti babadde basomera mu bibinja, okukola okunoonyereza n’okusomera awamu naddala empapula za Pass PLE ezifulumira mu Bukedde okulaba nga bategeera bulungi ebibuuzo ebiyinza okuleetebwa.
Cyprian Mwesigwa akulira Pass PLE Club ku ssomero lino yagambye nti abayizi baabwe bamaze okubateekateeka ekimala nga balindiridde buwanguzi bwokka. Quiz wa Bukedde waakubeerawo enkya ku Lwokutaano ku ssomero lya Kitante Primary School mu Kampala okutandika ku ssaawa 2.00 ez’oku makya.