Temugula ddagala mu maduuka awatali basawo batendeke - Bp. Kakooza

OMUSUMBA w’essaza ly’e Lugazi, Bp. Christopher Kakooza akubirizza abantu obutagula ddagala mu maduuka wabula bagende mu basawo abatendeke okwewala
ebirwadde ebirala ebiva ku ddagala eribaweebwa abatali basawo.
Omusumba Kakooza yagambye nti obuduuka gye buli obukyatunda eddagala nga  n’abalitunda si batendeke ekintu eky’obulabe so ng’abasawo bangi batendekeddwa ng’ekyetaagisa be bannannyini malwaliro oba ebifo ebitunda eddagal okuwa abasawo emirimu okujjanjaba abantu. Bino Bp. Kakooza yabyogeredde mu Mmisa mu kukwasa amabaluwa abayizi ba Nyenga Nursing and Midwifery Training School mu disitulikiti y’e Buikwe. Abayizi 173 be baamalirizza emisomo mu busawo okwabadde abazaalisa 92, ba nnansi 32 abaafunye dipulooma mu busawo, 19 mu buzaalisa so ng’abalenzi  baabadde 31 nga baafunye satifi - keeti. Yasabye abakulira eddwaaliro y’e Nyenga bakole ekisoboka okulaba nga tebasasuza bayizi nsimbi za kutendekebwa mwebyo bye basomye (Internship)  awamu n’okulaba nga bongera amaanyimu kwagazisa abantu  eddwaaliro eryo. Akulira ettendekero, Sr. Josephine Nakakaawa yagambye nti buli ekisoboka kikoleddwa okusitula  omutindo gw’ettendekero ly’abasawo nga kati bali mu kaweefube w’okwongera ku bisulo n’emmotoka etambuza abasawo okubatwala gye bayigira ebyo bye basomye. Omuyizi Jane Namugenyi okuva mu Bizinga by’e Buvuma eyasinze banne, Bp.
Kakooza yamukwasizza ekirabo okumusiima