Hajji Kiyimba kkooti emulagidde asasule obukadde 150 be yatulugunya

KKOOTI eragidde eyali ssentebe w'eggombolola y'e Nsangi era Ssentebe wa NRM mu Wakiso Hajji Abdul Kiyimba okusasula abantu be yatulugunya obukadde 150.
Omulamuzi Douglas Singiza owa kkooti enkulu ewozesa emisango gy’engassi yalagidde Hajji Kiyimba ne Kyengera Town Council (eyali ggombolola y'e Nsangi) okusasula ssente eri abavubuka 20: Henry Mukiibi, Ashraf Walugembe, Saddam Kateregga, Ivan Kawooya, Joel Edward Oketch, Raj Juuko, Dennis Ssamula, Jackson Mayanja Ssendagire, Rodney Sheema, Tevin Harris Kifuba, Mark Muhereza, Jabel Tushabomwe. Abbey Gwaivu, Andrew Kibalama, Ronald Ssenyonga, Yahaya Muyomba, Douglas Tumuhimbise, James Tindyebwa, Kelvin Kugonza ne Karim Yiga.
Kkooti yazudde nti, eddembe lyabwe lyatyoboolebwa bwe baakwatibwa ne batulugunyizibwa abantu abaakulemberwa Kiyimba mu 2020 bw’atyo n'alagira basasulwe obukadde 5 buli omu era buli omu bamwongere obukadde obulala 2 n’ekitundu olw’okuswazibwa kwe baayitamu.
Abavubuka bano omusango gwabwe baaguwaaba nga bayita mu kitongole ekirwanirira eddembe ly’obuntu ekya Human Rights Awareness and Promotion Forum (HRAPF) era mu mpaaba yaabwe bagamba nti, nga March, 29, 2020 mu muggalo gw’obulwadde bwa Covid 19 Kiyimba yakulemberamu ab’ebyokwerinda ne bazinda amaka gaabwe agasangibwa mu zooni ya Nkokonjeru ‘A e Kyengera ne babakwata.
Kiyimba omusango guno abadde abbinkana nagwo n’omuserikale w’amakomera ow’e Kitalya, Philimon Woniala oluvannyuma lw’omulamuzi Singiza obutafuna bujulizi bumuluma