Poliisi etaddewo ennamba z'amasimu ez'obwereere abantu kwe banaaloopera obumenyi bw'amateeka

POLIISI etaddewo ennamba z'amasimu ku kawunta za poliisi ez'enjawulo, okwongera amaanyi mu kuweereza abantu n'okunyweza ebyokwerinda nga tugenda mu nnaku enkulu.

Mu ngeri y'emu era waliwo ennamba okuli n'eya WhatsApp poliisi z'erangiridde, abantu ze balina okuyitako okuloopa abamenyi b'amateeka, abavuga obubi ebidduka n'obubenje bw'emiriro.

Ezimu ku nnamba zino, kuliko ezitasasulirwa okuli 0800199099 ng'eno ya traffic. Endala ey'okuyitako okuloopa obubenje bw'emiriro eri 0800 1212 222 so ng'ate eya Whatsapp eri 0779 999 999.

Omwogezi wa poliisi mu ggwanga, Kituuma Rusoke , alabudde abantu okwewala, okukozesa obubi essimu zino, omuli okulimba, okujerega n'okukwana abaserikale nga bazikutte.

Mu kusooka, Kituuma alabudde abantu okucakala n'obwegendereza nga bamanyi nti ebikolwa eby'ekitujju bikyaliyo , obufere n'obubbi era n'asaba ab'ebifo ebisanyukirwamu, ebikunyanga abantu abangi , ab’ebivvulu n'amasinzizo, okubeera abeegendereza ennyo.