Obubbi by'ebisolo n'ettaka bisattizza ab'e NaKifuma

Abatuuze n’abakulembeze b’okukyalo Kalagi n’ebyalo ebirala ebiri mu saza ly’e Nakifuma basattira olw’obubinja bw’ababbi obukozesa abaana enzaalwa z’okubyalo bino, abasitudde enkundi mu kubba ebisolo nga kwogasse n’okunyaga ettaka awamu n’ebibanja by’abantu.

Meeya w’ekitundu kino Isa Nvule ategeezezza ng’embeera eno bw’esinze okusajjulwa abatuuze b’ebyalo bino ababikkirira abaana baabwe abamanyiddwa obulungi nti bakozi ba bikolobero.

Ayongeddeko ng’era bwe baliko ba ssentebe b’ebyalo n’aba LC 2 be bazudde abali emabega w’obubinja buno, abakozesa abaana bano okubaggusiza emizannyo gyaabwe egy’obubbi nga bano balumba amaka ag’enjawulo mu kiro ne bamenya n’okubba ebintu by’abantu, okubba ebisolo omuli ente n’embuzi nga kwogasse n’okukola emivuyo ku ttaka ne basaawa emmere y’abantu era nga bano baatandise okubanoonyerezaako.

Abatuuze nga bali mu lukiiko

Omu ku batuuze Fred Ssonko awadde ab’ebyokwerinda amagezi ku binaamalawo obumenyi bw’amateeka mu kitundu kino olw’okutya kwe balina nti obubbi buno ate bulina abakulembeze ababwenyigiramu emabega ate abalinnya eggere mu bikwekweto ebibeera bitegekeddwa ekiwa ababbi enkizo okumalamu omusubi.

“Nsaba twettanire enkola eyaliwo edda nga mwewala okutegeeza ba ssentebe b’ebyalo ku bikwekweto bye mutegeka na ddi lwe binaakolebwa kubanga abo be batemya ku bakola ebikolobero ne badduka.

 Nsaba era tuttukiza n’enkola okufuna abantu abamanyi amakubo g’ebyalo byaffe bayambeko ab’ebyokwerinda nga bakola ebikwekweto byaabwe mu kiro kubanga ago ge bakozesa.”Ssonko bw’agambye.

Omubaka wa pulezidenti owa disitilikiti y’e Mukono Fatumah Ndisaba anenyezza poliisi okuvumaganya gavumenti olw’enkola y’emirimu gyaayo etali ya bwenkanya, bw’atyo n’asaba abakulembeze obutetuulaako wabula badduukire mu ofiisi ye basobole okuyambibwa.

Aduumira poliisi eno eya Nakifuma Naggalama Town Council Patience Namara akuutidde abakulembeze bano obuteetiirira okwanja ensonga zino gyaali zisobole okugonjoolwa era mu ngeri y’emu n’abakuutira okugiyambako okuzza emirembe mu bitundu bye bakulembera mu kampeyini z’akalulu ke twolekedde.