Omusamize agambibwa okusimula ebisigalira by'omuzungu bamukubye ne bamutta

OMUSAMIZE abadde agufudde omuze okuziikuulanga obuwangwa bw'abafu ku byalo bina e Wobulenzi mu disitulikiti y’e Luwero abatuuze bamuzingizza ng’azikuula omuzungu gwe babadde baakaziika wiiki emu ne bamukuba ne bamutta.

Entaana Eyasimuddwa.

Banne abalala ababiri poliisi ebataasizza ne batwalibwa wakati mu bukuumi obw’amaanyi.

Noah Lutwama 62, ye yattiddwa mu bukambwe obw’ekitalo olw'abatuuze okumukwata lubona ng’aziikula akawanga ka Richard Hogoson 73,  munnansi w’e ggwanga lya Britain abadde yawasa Reginah Nakanwagi ne basalawo bamuziike kuno abaana be basobole okumulabirako kuno.

Lutwama gwe basse ne banne ababiri okuli Abbey Luutu ne John Kiggundu poliisi yabataasizza era we yabasangidde baabadde bamaze okuziikula omulambo.

Sseguya Godfrey, ssentebe w’ekyalo kino agambye nti abantu bano baabasanze bamaze okumusimula nga babulako kumusalako mutwe.

Abakozi be be baakutte baategeezezza nti Lutwama yabadde abasuubizza obukadde 2 ng’omulimu guwedde.

Omwogezi wa poliisi mu bitundu bya Savannah, Sam Tweineamazina yategeezezza nga bwe batandise okunoonyereza ku nsonga zino n'okunonyerezza kui batuuze abaatwalidde amateeka mu ngalo.