Obukodyo mwe baferera ebikozesebwa mu kuzimba

ABATUNDA ebizimbisibwa bongedde okuyiiya obukodyo mwe bayita okufera bakasitoma be baguza ebintu ebitali ku mutindo n’ebitawera.
Fred Bogere, omuzimbi ng’alina ne Hardware e Nansana agamba nti ekimu ku bye basinze okwettanira kwe kutunda ebintu ebitawera n’ebitatuukana na mutindo nga kino kiri nnyo ku batunda seminti n’ebyuma ebikola enzigi n’amadirisa.
Akamu ku bukodyo akakozesebwa abatunda ebyuma kwe kutabula ebyuma ebyenjawulo nga tebabuulidde kasitoma. Omuntu ayinza okugula ebyuma ne yeekanga ng’atutte birala.
Waliwo amaduuka agasuubiza abakasitoma entambula y’ebintu ey’obwereere, kyokka oluvaawo ne babitoolako ne babizza munda olwo omuguzi ne bamuwa ebitawera.
Abatunda omusenyu nabo bagugatta ne bakuguza ogw’ennyanja, kyokka nga musingamu gwa pulasita. Bwe gubeera omungi, bamanyi n’okutuuka mu kkubo ne bagutoolako.
Waliwo amaduuka agagaba lisiiti ezitali mu mannya gaabwe n’ekigendererwa nti ne bwofuna obuzibu mu maaso basobola okukwegaana ng’okomyewo okwemulugunya.
Abantu abasinga baakikwata nti Elfu etikka bbulooka 1,000 kyokka abamu bamanyi okukolagana n’abazitunda ne batikka ezitawera.
Ebyuma ebikolebwamu enzigi n’amadirisa byawukana mu sayizi okugeza 1mm, 1.2mm ne 1.5mm era nga bino byawukana mu ssente kyokka abatali beesimbu oyinza okusasula ebya 1.5mm ne bakukolera mu bya 1mm ebya ssente entono n’asobola okufissa.
Bwe kituuka ku minzaani ezipima ebintu, nnyingi zibeera nfu ng’ebintu ebipimwa ng’emisumaali batunda bitawera.
Bogere agamba nti abantu baabulijjo kirungi okweyambisa abakugu mu by’okuzimba nga bagula ebintu ebimu kuba si byangu bya kwawula ng’obitunuulidde n’amaaso gokka. Okugeza kizibu okumanya sayizi y’ekyuma nga tolina bukugu.
Ying. Fred Jjuuko owa Jjuuko Constructions Uganda Ltd agamba nti omululu n’obutali bwensimbu mu bantu abamu kivuddeko ebizibu bingi okuli n’obubenje omufiiridde abantu olw’ebizimbe ebigwa.
Okwewala okuferebwa n’okubbibwa olina okwewala omuzimbi okutegeerera n’okumatiza okugula ku muntu omu kubanga emirundi egisinga obungi bano babeera n’ekkobaane ly’okukubba.
Okugeza ayinza okukubalira ssente eziri waggulu oba ebintu nga bingi okusinga ku bye weetaaga ebirala ne babigabana.
Babeera n’ebintu ebyefaanaanyiriza ky’oyagala okugeza amabaati kyokka nga bbeeyi eyawukana katono. Mu mbeera eno oyinza okukomekkereza ng’otutte ebintu ebitatuukana na mutindo.
Abamu bakyusakyusa emiwendo buli kiseera naddala abakozesa enkola y’okuggulawo akawunti.
Jjuuko awadde abantu amagezi g’okukwenyigira mu kugula ebintu byabwe n’okukola okunoonyereza mu bifo eby’enjawulo okumanya emiwendo bwe giyimiridde.
Abalina sayiti ennene balina okwewala okukozesa enkola y’okutabuza ssementi n’omusenyu n’ekitiiyo badde ku mixer okwewala obubbi bwa ssementi.
Okwewala okuwa abazimbi obuvunaanyizibwa obwenkomeredde ku bintu byonna abamu babbi era si beesimbu.