Hadijah Namyalo asiimye Omulangira Nakibinge olw'okwagazisa abavubka Obusiraamu

AKULIRA offiisi ya ssentebe wa NRM mu  ggwanga Hajjat Hadijah Namyalo atenderezza  Jjajja w’obusiraamu Omulangira Kassim Nakibinge olw'okwagazisa bamusaayi muto eddiini yaabwe n’okugiweesa ekitiibwa.

            “Omulangira Nakibinge ffe ng’Abasiraamu era abakkiririza mu ddiini y’obusiraamu buli lwetukulabako tulabira ddaala ekitangaala ky’eddiini yaffe ey’obusiraamu kubanga okoze nnyo okwagazisa abaana baffe abato eddiini eno, okugimanya ssaako n’okugiwa ekitiibwa era tusaba Allah akutuwangalize” Namyalo bweyategezezza.

            Bino Namyalo yabyogeredde ku mukolo  gw’e mpaka z’abamusaayi muto abawala n’abalenzi eza kamalirizo nga batuuka mu kusoma ekitabbo ekituvvu “Quran” ogwabadde ku Serena Hotel mu Kampala ku Ssande.

Namyalo  yasabye abasiraamu bonna mu bifo gye bakola naddala mu bitongole bya gavumenti  n’e byo bwa nnannyini okwongera okwolesa  ekifaananyi ekituufu eky’eddiini y’obusiraamu  nti ya ddembe  era erafubaana kukolaganira wamu n’abantu bonna wadde si basiraamu.

            “Abo ababadde balowooza nti gavumenti yaffe teyagala basiraamu, ekyo kikyamu era nasaba abasiraamu bonna ababeera baweereddwa ebifo eby’obuvunaanyizibwa mu bitongole bya gavumenti okwongera okwagazisa bannayuganda obulungi bw’e ddiini eno eri buli muntu” Namyalo bweyategezezza.

            Ye Omulangira Kassim Nakibinge eyabadde omugenyi omukulu  yeebazizza Allah okubasobozesa okubasisinkanya ku mpaka za Quran ezisooka mu Uganda okubeera  mu kifo  eky’e bbeeyi nga Serena kubanga bulijjo abazitegeka tebaziteeka mu bifo nga bino.

Yawadde bamusaayi muto abeetabye mu mpaka zino amagezi okukula nga banywereera ku kigambo kyabwe kubanga omuntu anywereera ku kigambo kye kimufula ow’enjawulo ku balala.