Agumizza ku bbula ly’amazzi mu Kampala

EKITONGOLE ekivunaanyizibwa ku kubunyisa amazzi mu bantu kiwadde Bannakampala essuubi ku bbula ly’amazzi eriri mu bitundu eby’enjawulo nti lyakuggwaawo essaawa yonna.
Mu bimu ku bitundu Bukedde bye yatuuseemu okuli munisipaali y’e Lubaga, amazzi gamaze ennaku mukaaga nga tegatuuka ku bantu ate lwe gaddako gaba matono.
Omwogezi w’ekitongole ky’amazzi, Sam Apedel yagambye nti ebbula ly’amazzi livudde ku mirimu gy’ekikugu egikolebwa mu kitongole e Ggaba n’e Katosi gye gava okusaasaanira ebitundu eby’enjawulo, nti wabula mu bbanga ttono bijja kuggwa.
“Buli olukya abantu beeyongera obungi mu bitundu bya Kampala n’emiriraano era
bangi basaba okuyungibwa ku bakozesa amazzi ga National Water and Sewerage Corporation (NWSC). Obungi bw’abakozesa amazzi buviirako emisinde oba
puleesa y’amazzi okukendeera ttaapu ne zisumululwa nga tegajja oba nga gajja kasoobo.” Apedel bwe yagambye.  Yayongeddeako nti “Ebitundu ebikoseddwa mu  ntambula y’amazzi eya kasoobo ekitongole kibateereddewo entegeka eyatuumiddwa ‘Package 2B’ egenderera
okwongeza amaanyi puleesa mu nziruka y'amazzi mu bitundunga Matugga, Buloba,  Bulenga, Kyengera Maya n’ebirala.” Apedel agamba nti amazzi mu itundu bino gabadde gajja kitono kyokka abakugu baabwe bakoze ekisoboka e Ggaba n'e Katosi era kati biteredde era mu bbanga ttono empeereza yaakutereera