Abalaze obukulu bw’okusomesa abaana

SSENTEBE wa FDC mu Nakawa era nga yaliko kkansala wa Nakawa 1, Moses Mugisha Okwera asabye abazadde okunyiikira okusomesa abaana ng’omu ku kaweefube w’okukendeeza ku muze gw’obumenyi bw’amateeka mu kitundu.

Bino Okwera yabyogedde bwe yabadde yeetabye ku mukolo gw’okujaguza n’okwebaza Katonda olw’abayizi ku ssomero lya Nakawa Union Vision SS e Butabika okukola obulungi mu bigezo eby’akamalirizo eby’omwaka oguwedde. Okwera yasiimye abaddukanya essomero lino nga bano bannansi ba South Korea, Rev. Kim Sung ne Rev. KimSangwan abaalitandikawo kubanga kiwadde abaana omukisa okufuna mu byenjigiriza. Abazadde nga bakulembeddwaamu Nnaalongo Esther Lwanga baasiimye abazadde abafaayo okwerekereza kyonna ekisoboka ne baweerera abaana nti bayambyeko okutangaaza ebiseera by’abaana baabwe eby’omu maaso. Abayizi okuli; Joseph Onyala eyafunye A (9) ne Noah Owomugisha eyafunye A (7) B(2) abaakoze obulungi mu bibuuzo bya S4 baasiimiddwa n’abasomesa abaakulembeddwa Mary Namazzi omukulu w’essomero eryo