Abantu 13 bafiiridde mu kabenje e Bugiri

Bya Willy Semmanda

ABANTU 13 be baafiiriddewo n’abalala mukaaga(6) ne babuukawo n’ebisago eby’amaanyi, emmotoka ya takisi ey’ekika kya Drone bwe yatomereganye ne tuleera ku luguudo oluva e Bugiri okudda e Iganda.

Akabenje kano dekabusa kaaguddewo ggulo ku Mmande ku ssaawa nga 9:30 ez’oku makya ku kyalo Lwaba mu kiseera ng’enkuba efudemba, takisi nnamba UBQ 772A bwe yatomeraganye ne tuleera nnamba KBM 157S – ZF 3160, abantu babiri abaabadde batambulira ku bodaboda.

Eyeerabiddeko n’amaaso ge ng’akabenje kano kagwawo Joseph Sooka, yagambye nti omuvuzi wa boda eyabadde aweese omukazi nga badda Bugiri, pikipiki yamuwabyeko bwe yabadde egezaako okuyisa takisi olwo ne bakuubagana ne takisi okukkakkana nga basibidde ku kyana kya ttuleera okwabuuse ki kkonteyina ekimu ne kigwera abaabadde ku boda ne bafiirawo.

K baabadde mu takisi, abasaabaze 11 baafiiriddewo mbulaga ate omulala omu n’afa nga bamuddusa mu ddwaaliro ng’abaabadde baakategeerekeka amannya we twakoledde eggulire lino kwabaddeko: omukulu w’essomero lya Buffaki Primary School e Mayuge Nathan Kirya, Kasimu Mugwere ow’e Busia, Jamada Yakuti ow’e Bugiri, omusuubuzi w’e Muwayo Tony Wabwire, ne Margret Nakibuka.

Mu kusooka abaakoseddwa baddusiddwa ku Ddwaliro ekkuli erye Bugiri kyokka aliddukanya Anthony Wamasyuwo yategeezezza Bukedde nti bana(4) ku baaleeteddwa nga bayi baabongeddeyo mu ddwaaliro ekkulu e Jinja n’akoowoola abantu abatamanyi bantu baabwe gye bali okuddukira mu ddwaaliro ekkulu e Bugiri balabe oba be bam uku baafudde nga tebalina biboogerako.

Ebidduka ebyabadde mu kabenje kano poliisi yabiggyeewo n’ebiwalula okutuusa ku kitebe kya poliisi ekya Bugiri Central Police Station ng’okunoonyereza bwe kukyagenda mu maaso.

Omwogezi wa poliisi mu bitundu bya Busoga East, Michael Kafayo yakubirizza aba boda okuvuga nga bagoberera amateeka g’ekkubo n’agamba nti poliisi ekyali ku kaweefube okuzuula amannya g’abagenzi abatannamanyika