Abakozi ba Hajjati Namyalo bamukoledde akabaga k'amazaalibwa ne bamuyiira 'ensimbi'

AKULIRA ofiisi ya ssentebe wa NRM mu ggwanga, Hajjat Hadijah Namyalo katono afe essanyu abakozi be bwe bamutegekedde akabaga k’amazaalibwa ne bamuyiira ssente omubadde ne ddoola.

Namyalo Ng'essanyu Libula Okumutta Nga Bamuwa Ssente.

Namyalo eyabadde takisuubira  nti eriyo amulowoozaako okumukuliza amazaalibwa ge kubanga galiwo ku Lwokutaano lwa wiiki ewedde nga May 23, 2025 kyokka bo abakozi ne beefuula nga abatakimaanyiko.

Ku  Lwokusatu bwe yazze ku mulimu nga bulijjo ku ssaawa nga 6:00 ng’ava mu nkiiko yasanze bamutegekedde dda sapulayizi ya kkeeke n’okumuyiira ssente okwabadde obw’emitwalo 2 ne ddoola kyokka waliwo mu bo eyamuwadde ebinusu bina ebya 500/- ebikola 2000/- ekyasanyusizza nnyo Namyalo.

Abaserikale Nga Batongera Hajjati Namyalo Ssente

 Yagambye nti akabaga ka mazaalibwa kano ke baamukoledde kamwongedde amaanyi okulaba ng’afungiza n’ag’omubuto okulaba nga mukama we YK Museveni akalulu ka 2026 akawangulira waggulu.

Namyalo Ng'azina N'omutume Benson Kayondo

Oluvannyuma baamukubidde obuyimba bwa bamazaalibwa ge obw’enjawulo n’abazinira namu era ku mukolo guno kwabaddeko n’omusumba w’abalokole  Omutume Benson Kayondo  akulira ekibiina ky’abalokole ekya “Reformed Generation of Pastors and Preachers Association (RGPPA), e Ntinda naye gwe yazinye naye.