Ebyenfuna bisuubirwa okukulira ku sipiidi omwaka ogujja

MINISITA w’Ebyensimbi, Matia Kasaija atenderezza enkulaakulana etuukiddwaako n’alaga ng’eggwanga bwe ligenda okukulira ku sipiidi mu mwaka gw’ebyensimbi ogwa 2024/2025.
Bajeti yasomeddwa mu lutuula lwa Palamenti olwatudde mu kisaawe e Kololo nga lwakubiriziddwa Sipiika wa Palamenti, Anita Among.
Ku Bajeti y’obuwumbi 72,376 ey’omwaka ogujja, Gavumenti esuubira okukung’aanya obuwumbi 37,000 okuva mu ggwanga.
Obuwumbi 34,000 zijja kuva mu misolo egikung’aanyizibwa URA, obuwumbi busatu zijja kuva mu gitali misolo ate obuwumbi 328 zikung’aanyizibwe Gavumenti
z’ebitundu. Obuwumbi 11,380 zigenda kwewolebwa okuva munda mu ggwanga.
Kasaija yayozaayozezza Pulezidenti Museveni olw’okukulemberamu enkulaakulana
etuusizza Uganda okubeera emu ku nsi ezisinga okukulira ku misinde mu nsi yonna. Mu
kiseera kino bizitowa obuwumbi bwa doola za America 61.3 okuva ku buwumbi bwa doola 27.9 ezaaliwo mu 2010/11.
Mu March wa 2024, Uganda yasuumusibwa okutuuka mu lubu lw’amawanga agali yaddeyako mu byenkulaakulana. Uganda ruubirira okuzimba ebyenfuna
okutuuka ku buwumbi bwa doola za America 500. Obuwangaazi bw’abantu
 weyongedde okutuuka ku myaka 68 mu 2023/24 okuva ku myaka 63 gye baali bawangaala mu 2010/11. Ate mu 2002 baali awangaala emyaka 50.
Mu kiseera kino eggwanga lirina enguudo za kkoolaasi oba ez’ettaka ennungi ezituuka ku nsalo z’amawanga zonna. Eggwanga eryali liyimiridde ku mmwaanyi, ppamba, copper, taaba, caayi n’ebyobulambuzi mu kiseera kino lyayongerako ebyettunzi ebirala 31 mwe lifuna ssente.
Kasaija yalaze nti mu myaka 10 egiyise Gavumenti yaakassa obuwumbi 9,000 mu nkola
z’okugaggawaza Bannayuganda okuli; Uganda Development ank (obuwumbi 1,450), Parish Development Model (obuwumbi 3,300). Omwaka gw’ebyensimbi ogujja ebyenfuna bisuubirwa okukulira ku bitundu 7 ku 100.
Ate nga kijja kusukka Uganda bw’eneetandika okusima amafuta gaayo era esuubirwa okutuuka ku buwumbi 254,200.
Omwaka guno ebyenfuna bikulidde ku bitundu 6.3 ku 100. Entemaatema ya bajeti eri mu miko gyaffe egiddako