Ssaabasumba Ssemogerere asiimye Bannamawulire

Ssabasumba w’essaza ekkulu ery’e Kampala, Paulo Ssemogerere yeebazizza bannamawulire n’emikutu gy’empuliziganya olw’okuyamba Klezia ekubunisa ekigambo kya Katonda.

Saabasumba n'abamu ku bannamawulire

Y’abasiimye mu ngeri ey’enjawulo olw’okutuusa kubantu obubaka bwa Katonda, mu biseera by’ekirwadde kya Covid-19, ngabakozesa emikutu egy’enjawulo, omwali telefaayina, radio, n’emikutu gyimugatta bantu, sso nga eggwanga lyonna lyali kummuggalo.

“Omulimo gwemwakola gwe wamma gwali gwa ttendo. Abantu bangi mwabasobozesa okufuna ekigambo kya Katonda ngabali nabaana baabwe, mu ddiiro lyabwe. Omulimo gwemukola mulungi ddala. Gwakusaasaanya mawulire agasanyusa ag’Evanjri. Sso ate era olumu mufuna ebizibu nga mukola, omuli n’okubakuba emiggo. Naye musigale nga muli bavumu,” bweyategeezezza.

Yabadde ayigiriza mu mmissa ey’okukuza olunaku lw’eby’empuliziganya olw’ensi yonna olw’omulundi ogwa 59. Omukolo gwabadde ku kiggwa kya Biikira Maria e Kiwamirembe, ekisangibwa mu Kajjansi Town Council, mu disitulikiti y’e Wakiso ku Lwomukaaga nga June 14, 2025.

Ssabasumba wabula y’asabye Bannamawulire bafeeyo okulaba nga tebatabangula birowoozo oba embeera z’abantu bwebaba babatusaako amawulire. Y’ategezeezza nti wadde ensi erimu ebintu bingi ebitali birungi, okugeza obuli bw’enguzi, entalo, obukyayi, obutayagaliza, okukonjera, obusosoze, ettemu, obutasonyiwa, obutafa kubalala, n’ebirala,naye waliwo n’ebintu ebirungi, ,n’asaba Bannamawulire n’ebintu bino ebirungi, n’addala amawulire agasanyusa ag’Evanjiri, babitegeeze abantu, basobole okuddamu essuubi.

Kkwaaya

“Mukozese obukodyo n’obukugu bwemulina, abantu mubaagazise eddiini, bategeere ebikusike ebiri mu Vanjiri. Waliwo amawulire agamu agatumalamu amaanyi, olumu negatuleetera n’okweraliikirira olw’emitwe gyago eminene ate nga mizito, negitiisa abakulu n’abato. Sso ngate waliow ebinu ebiiungi, okugeza nze kinsanyusa nnyo okulaba abavubuka nga abangi bwemutyi nga muzze wano e Kiwamirembe, nga musaba ate nga n’okwejjusa mwejjusa.  Sitaani waali, naye n’ebirungi tubirina, naddala mu ddiini. Ebisoomooza weebiri, amawulire ag’obulimba mangi, naye abantu mubamanyise nti Katonda waali era yemukulu w’obulamu bwaffe. Ngamukola omulimo gwammwe mubeere beerufu, beetowaze, era muzimbagane,” Ssabasumba bweyategeezezza.

Ssabasumba oluvannyuma yawadde Bannamawulire amagezi nti bwebaba baagala okugasa ensi eno mu ngeri esingako, abantu basinge lubasomesa ngabakozesa empisa zaabwe ennungi.

Mububaka bwe bweyatisse Dr Grace Kizito Bakyayita, Ssabakristu w’essaza ekkulu ery’e Kampala, Emily Kitto Mwaka n’aye y’asiimye Bannamawulire, n’addala abo abaweerereza mu Klezia, olw’okuyamba ku Bannaddiini okutuusa kubantu ekigambo kya Katonda.

kkwaya ng'eyimba

Ssenkaggale wa Radio Sapientia, Fr Dr Joseph Mark Lubuula Bannammawulire y’abasabye omulimo gwabwe bagukole n’okwagaja, n’okukkiriza, era n’obukakkamu, kubanga mubo abantu mwebalabira ekifaananyi kya Klezia.

Munnamawulire Freddie Ssekitto yawabudde Bannamawulier abato obutafuna Malala, n’okussaamu bakulembeze b’Eklezia ekitiibwa, nga lwebanaasobola okuba abawanguzi.

Akulira ekitongole ky’Ebyamawulire eky’essaza ekkulu ery’e Kampala, Fr Joseph Mukiibi y’ategeezezza nti ekitongole kigenda kutandikawo pulojekiti ey’okweyimirizaawo.

Omukolo gwetabiddwako Bannamawulire bangi, aba Klezia n’ab’ebitongole ebirala, nga baavudde mu bigo eby’enjawulo eby’essaza ekkulu ery’e Kampala.

Rector w‘ekiggwa ky’e Kiwamirembe, Faaza Edward Kabanda naye omukolo guno y’agwetabyeeko era n’asiima Bannamawulire okulamaga.