Muntu yeeyamye okuliyirira ab'omu mambuka abaakosebwa mu lutalo

EYALIKO omuduumizi wa UPDF, Major.Gen.Gregory Mugisha Muntu agumizza abantu b’omu mambuka ga Uganda  abaafiirwa ebintu byabwe mu lutalo lwa Kony nti bw'afuuka Pulezidenti waakubaliyirira.

Muntu ng'ayogeramu n'abaayo.

Muntu bw'abadde asaggula akalulu mu disitulikiti y'e Gulu ne Amuru, abantu abaasimattuka okufiira mu lutalo lwa Kony kyokka nga baafiirwa ebintu byabwe omwali ente n'ebirala ,bamulaajanidde ku mbeera gye bayitamu olwa gavumenti okulwawo okubaliyirira.

Eno Muntu abasuubizza nti bwe bamulonda ku bwapulezidenti ensonga zaabwe waakuzikolako okulabanga baliyirirwa kyokka n'ategeeza nti era gavumenti era yaakulabanga abantu mu bitundu bino bongerwa okubudaabudibwa obulungi olw'ensonga nti bangi baafuna obuvune n'okutulugunyizibwa kwe baayitamu bikyabakosa n'okutuusa ekiseera kino.

Abatuuze mu disitulikiti y'e Gulu ne Amuru era balaajanidde Muntu ku nsonga y'Abalaalo ababalumbagana mu bitundu byabwe emmere yaabwe yonna ne bagiriisa ente era mu kwanukula Muntu abasuubizza nti bwe bamulonda ekizibu ky'abalaalo ababalumba nakyo ajja kukisalira amagezi.

Abamu ku bawagizi ba muntu nga bamuwuliriza.

Bo abakadde mu Gulu, bategeezezza Muntu nti Ssente z'abakadde bawulira mpulire ku mawulire wadde baaweza dda emyaka 80 egyassibwawo gavumenti okuzifuna ne bamusaba nti bw'afuuka Pulezidenti nabo abalowoozeko ng'abakadde n'abagumya nti ajja kubakolako.

Mu bizibu ebirala, abantu b'e Gulu bye basabye Muntu akoleko kuliko; amasannyalaze okuvaavaako, ebbula ly'eddagala mu malwaliro, amasomero n'ebirala n'abasuubiza nti ajja kubigonjoola.

Muntu asabye abantu mu bitundu by'e Gulu okukolera awamu okuleeta enkyukakyuka ey'emirembe mu ggwanga.