Batongozza enteekateeka y'okusigaza abaana aboobuwala mu masomero e Luuka

ABA Stromme Foundation batongozza kampeyini y'okusigaza abaana aboobuwala mu masomero .

Enteekateeka eno bagigassekko obuyiiya bwe bakoze ensawo z'abayizi ezituumiddwa  ECOJUA ezikozesa amasannyalaze g’enjuba ne bazigabira abayizi ba Namakakale Primary School ne Walibo Primary School mu Disitulikiti y’e Luuka mu buvanjuba bwa Uganda.

Enteekateeka eno egenderera okutumbula abaana abawala n’okulaba ng’abaana basigala mu masomero wadde nga waliwo okusoomoozebwa okuva mu kulima ebikajjo mu kitundu kino.

Essira basinze kulissa ku kulwanyisa obwavu, okulwanyisa embuto z’abavubuka, n’ekyabazadde okufumbiza abawala abatenneetuuka nga bayita mu pulogulaamu Bonga after-school clubs eyambako okubangula abawala mu bukugu obwenjawulo n’okutwala obuvunaanyizibwa ku biseera byabwe eby’omu maasonga bakola okusalawo okutuufu. 

Ensawo zino eza ECOJUA ezikoleddwa ekitongole kya Smart Girls Foundation nga zivujjirirwa aba Stromme Foundation, teziyingiramu mazzi, ziriko paadi z’obuyonjo ezisobola okuddamu okukozesebwa, amataala g’enjuba agayambako omuyizi okusoma ebitabo mu budde bw'ekiro, n’obutabo obusomesa ku nsonga z'abakyala.

Joseph Walugembe, akulira eby'emirimu mu Stromme Foundation, yalaze obwetaavu bw’okukola kaweefube ng’ono mu bitundu ebirimibwa ebikajjo ng’eno abawala abato gye banguyirwa okusendebwasendebwa okwegatta nga bakyali bato.

Abakulembeze basunyukidde enteekateeka eno

Ku ssomero lya Walibo Primary School, akulira essomero, Rebecca Babilekele yasiimye obuwagizi bwa Stromme Foundation olw’okuyamba abawala abataliiko mwasirizi okuziyiza okusendasenda ssente z’omuwemba n’okusigala ku ssomero.

Omumyuka wa Meeya Namango Alice yasiimye enteekateeka eno, n’asaba abazadde okukulembeza ebyenjigiriza okulwanyisa ekizibu ky'abaana aboobuwala okufuna embuto nga bakyali mu masomero.