Agambibwa okutta munne embwa ya poliisi emukukudde mu ttooyi nga yeekwese
POLIISI y’e Matugga mu munisipaali y’e Nansana ekutte n’eggalira omuvubuka agambibwa okutta munne ng’ono embwa ya poliisi y’emukutte kyokka olubadde okumukwata n’atandika okwegayirira poliisi emusonyiwe.
Agambibwa okutta munne embwa ya poliisi emukukudde mu ttooyi nga yeekwese
Ettemu lino libadde ku kyalo Ssanga ekisangibwa mu diviizoni y’e Gombe abatuuze bwe baguddemu ekyekango oluvannyuma ly’okugwa ku mulambo gwa mutuuze munnaabwe ayitibwa Micheal Ssekiranda 26, abadde akola ogw’okukanika pikipiki e Ssanga ku luguudo lw’e Semuto.
Poliisi ng'eggyawo omulambo gw'omugenzi.
Omulambo gwa Ssekiranda gusangiddwa mu kayumba akaliraanye ekkubo ng’abatuuze abaliraanye akayumba kano be balabye omulambo guno bwe batyo ne bayita abakulembeze b’ekitundu nga nabo kye bakoze bayise poliisi y’e Ssanga.
Poliisi olubadde okutuuka n’eteekawo akaguwa okutangira abatuuze okusaalimbira okumpi n’ekifo kino okutuuka bwe baleese embwa yaayo enkonga olusu okukkakkana ng’esibidde ku Dominiko Kavuma 27, abadde yeekwese mu kaabuyonjo.
Kyokka Kavuma olubadde okumukwata atandikiddewo okwegayilira okumusonyiwa kwekyo kye yakoze nga wano poliisi emutadde mangu ku kabangali yaayo okumutuusa ku poliisi y’e Ssanga okusobola okumuwonya abatuuze.
Akulira ebyokwerinda ku kyalo kino Ahmed Kamya yagambye nti omuvubuka akwatiddwa abadde asumbuwa ekitundu era nga y’omu ku bantu be babadde beekengera mu kutta abavuzi ba boda boda nga kwotadde n’okuteega abantu ku kkubo eridda e Nasse ku luguudo lw’e Ssemuto.
Omwogezi wa poliisi mu Kampala n’emiriraano, Racheal Kawala agambye nti poliisi etandise okunoonyerezza ku ttemu lino era okusinziira ku kye baakanoonyerezaako, waliwo bye baakazuula ku Kavuma akwatiddwa nga ssinga obujulizi bubaawo waakuvunaanibwa mu mateeka.