Ow'amakomera atangaazizza ku kya Pulezidenti okusonyiwa abasibe

OMWOGEZI w'ekitongole ky'amakomera mu ggwanga, Frank Baine, awakanyizza ebizze bibuungeesebwa nti Pulezidenti y'alonda amannya g'abasibe abookusonyiyibwa.

Baine ,annyonnyodde nti wabeerawo enkola ennambulukufu era amanyiddwa, egobererwa mu kuwa abasibe bonna  ekisonyiwo nti oluvannyuma enkalala z'amannya ne ziweerezebwa eri omukulembeze w'eggwanga ye n'asalawo eky'enkomeredde.

Agambye nti, abamu ku basibe , beeyambisa ba puliida baabwe okuwandiikira akakiiko akasemba okugaba ebisonyiwo nti olwo ne kongerayo erinnya ew’omukulembeze w'eggwanga nga ye we nkomeredde.

Ayongeddeko nti ebiseera ebisinga , amannya gaviira ddala mu kifo mwe basibidde omusibe, ne gasindikibwa eri akulira amakomera mu ggwanga nti olwo naye n'agasindika mu kakiiko kano, okutuukira ddala eri omukulembeze w'eggwanga.

Awabudde nti ebintu bingi, bye basinziirako okusemba omusibe ayimbulwe, okuli eky'omujjuzo mu makomera eri abo aboobusango obutonotono, eri abo ababadde bakola obulungi emirimu gyabwe n'ebirala bingi.