Ekkanisa y'Abadiventi eronze omusika wa Kajoba

SSAABALABIRIZI w’e Kkanisa y’aba Adventist mu Uganda, Omusumba Samuel Kajoba asabye abakristaayo bonna okunnyikiza eky’okukola emirimu egivaamu ssente okusinga okwemalira mu kusaba kwokka.
Kajoba, yasinzidde mu lukungaana lw’okulonda omulabirizi wa Central Uganda ku ssomero lya St. Julina e Gayaza mu Wakiso lwe bamazeemu ennaku essatu okutuusa lwe baalonze omusumba David Ssimwogerere.
Ssimwogerere yaddidde omusumba Kajoba mu bigere obuvunaanyizibwa bw’amazeeko emyaka 10 okutuusa lwe yasuumusiddwa ku kya Ssaabalabirizi wa Uganda.
Mu lukungaana luno, Kajoba yategeezezza nti, obukulembeze obulungi bukolebwa omuntu alina omutima omulungi ate omukulembeze mu by’ekkanisa ateekedda okuba omulungi mu by’omwoyo.
Yagambye nti, buno bwe buluubirira okutwala abantu mu bw’akabaka obw’omuggulu era bukozesa nnyo ekitabo ekitukuvu ne bulungamizibwa mwoyo mutuukirivu.
“Ekiseera kino ekkanisa essira eritadde ku kuzimba abantu ne kigambo kya katonda nga tukubiriza buli mu Krisitaayo okubeera n’ekitabo ekitukuvu eky’obwannannyini ekiri mu lulimi lw’ategeera era ng’akisoma”. Kajoba bwe yagambye.
Yagasseeko nti era obwanga baakubwolekeza ku kubunyisa enjiri mu bantu kuba omuntu anyikidde mu kigambo kya Katonda, yeewala okukola ebikyamu ng’ettemu, obwenzi n’emize emirala.
Yayongeddeko nti, oluvannyuma lw’okulonda omulabirizi ono, ate bagenda mu West Buganda e Mityana ne North Buganda e Katikamu. Yasabye Bannayuganda okukuuma emirembe mu kaseera k’okulonda.
Pr. Ssimwogerere, omulabirizi omulonde, yeebazizza katonda olw’okulondebwa okutwala obuvunaanyizibwa buno, era gamba nti gwe yeesize yekka okubutuukiriza,
Agamba nti mu kiseera kino, ng’omulembe gugenda gwonooneka, balina obuvanaanyizibwa bw’okusiga ekigamba kya Katonda mu bantu okubazza mu kkubo eggolokofu.
Omuwandiisi omukulu eyalondeddwa Pr. Johnson Kalumba, naye yeebazizza Katonda olw’okumuteeka mu woofiisi ey’obuvunaanyizibwa. Yakoowodde abantu bonna b’agenda okukulembera nabo okukolera awamu okutwala obuvunaanyibwa bw’ekkanisa mu maaso.
Pr. Johnson Kalumba addidde Pr. Melczadech Kyeyune mu bigere, Omuwanika ye Racheal Katiti abadde mu North Buganda ku ssomero lya Katikamu SDA era gw’addidde mu bigere ye Eld Edward Miiro. 
Abalala abaalondeddwa kuliko, Pr Joseph Sembusi (Ow’ebinjiri), Esther Nsubuga (w’abakyala), Dunstan Mulumba (wa bavubuka), Joseph Namugera (byabulamu), Gofrey Kulumba (Njiri), Ssali Kisakye (byanjigiriza), Perez Teroitich (mawulire) ne Damiano Kato (muteesiteesi)