Bakazi baggya ababadde beekobaanye okusalako bbaabwe obusajja poliisi ebakutte

Abakazi babiri abagambibwa okugezaako okusalako bbaabwe , ebitundu bye eby'ekyama nga bamulumiriza obwenzi, bakwatiddwa poliisi.

Bibadde ku kyalo Butayunjwa B mu ggombolola y'e Buyanja mu disitulikiti y'e Buyende, bwe baafumbikirizza bbaabwe Robert Bebwa 51,  nga y'amyuka ssentebe wa LC 1 ku kyalo ekyo ne bagezaako okumukekejjulako ebitundu bye, ebyekyama.

Poliisi y'e Kidera, ekutte  Esther Naluvuma 44, ne Norah Nakayunja 53 nga bombi bakazi baggya nga batuuze b'e Buyanja olw'okutuusa obuvune ku muntu.

Omwogezi wa poliisi mu Busoga North, Samson Lubega, agambye nti Bebwa atwaliddwa mu ddwaaliro lya Kidera Health centre IV , okufuna obujjanjabi ng'okubuuliriza bwe kukolebwa.