Poliisi eyodde 70 mu kikwekweto ky'ekoze mu kampala

POLIISI mu Kampala eyongedde amaanyi mu bikwekweto okulwanyisa ebikolwa by’obumenyi bw’amateeka mu biseera bya Ssekukkulu bw’ekutte abantu 70 n’ebaggalira.

Ekikwekweto kino kyakoleddwa poliisi ya CPS mu kiro ekyakeesezza ku Lwomukaaga nga abaserikale bagenze mu bifo ebimanyiddwa nti abamenyi b’amateeka gye bagumba n’okuteega abantu ne bababba omuli abasala ensawo n’abanyakula ebintu ku bantu abali mu keetalo ka Ssekukkulu.

Amyuka omwogezi wa poliisi mu Kampala n’emiriraano, Luke Owoyesigyire yagambye nti ebikwekweto ebikolebwa bigendereddwamu okulaba nga obumenyi bw’amateeka bukendeera ng’abaserikale ba CPS  basobodde okukwata abantu 70 ne babaggalira.

Yagambye nti mu kikwekweto abaserikale basobodde okukwata ku bamu ku bamenyi b’amateeka ab’olulango nga balina emisango ku poliisi ez’enjawulo nga bano bagenda kukung’aanya ffayiro ze balina basobole okukwatibwa mu kkooti.

Yategeezezza nti okuva ebikwekweto by’okugogola ebitundu eby’enjawulo mu Kampala n’emirirwano poliisi esobodde okukwata abantu abasoba mu 200 nga mu kino poliisi eruubirira okulaba ng’obumenyi bw’amateeka n’emisango gikendeera mu nnaku za Ssekukkulu.

Yasabye nti okubeera obulindaala nga beekengera abamenyi b’amateeka nga batemya ku poliisi nga balina be batebeereza okubeera abamenyi b’amateeka be balaba mu bitundu byabwe.