Museveni asuubizza okukola enguudo mu Bukomansimbi

PULEZIDENTI Museveni asuubizza abantu b’omu disitulikiti y’e Bukomansimbi okubakolera oluguudo lwa Sembabule, Mateete, Mbiriizi, Bukomansimbi okutuuka e Masaka lubayambe okutumbula eby’obulimi mu kitundu.

Yagasseeko nti, agenda kuzzaako okubakolera oluguudo lwa Mateete, Kibinge okutuuka e Kyabakuza.

Museveni yagambye nti, oluguudo olwo nga lukoleddwa ne lwegatta ku lwa Mpigi–Kanoni–Madu–Sembabule awo abantu b’e Bukomansimbi banaaba tebalina nsonga lwaki bakaaba obwavu.

Yasinzidde ku kisaawe kya Mirembe Muslim Primary School mu ggombolola y’e Kitanda mu Bukomansimbi bwe yabadde agenze okunoonya obuwagizi bwe obunaamutuusa ku kuwangula akalulu ka bonna aka January 15, 2026.

Museveni yagambye ab’e Bukomansimbi batandike okwenyigira mu bulimi obw’ekibaalo okuli okulima nga bafukirira awo lwe bajja okufuna mu bulimi ekisinga.

Sipiika wa Palamenti, Anita Annet Among, yasabye abalimi b’emmwaanyi e Bukomansimbi okujjumbira okukozesa enkola y’okufukirira kubanga ettaka lyabwe kkalu nnyo ekivaako ebirime obutakula bulungi.

Ssentebe wa NRM mu disitulikiti y’e Bukomansimbi Shafik Mwanje era nga y’akiikirira abantu abaliiko obulemu ku lukiiko lwa NRM olufuzi CEC, yagambye nti, abantu bangi bagaggawalidde ku mulembe gwa NRM mu kitundu kyabwe naddala abalima emmwaanyi.

Yalaze nga singa Pulezidenti abakolera enguudo nga bw’asuubizza kijja kwongera okusitula ebyenfuna by’abantu.

Yasabye babakolere oluguudo okuli; Kagologolo, Bulenge, Kigangazi, okutuuka e Lukaya gattako, Kyabakuza, Buyoga okutuuka e Mateete.

Mu ngeri y’emu Mwanje yasabye Museveni okubazimbira eddwaaliro lyabwe erya Bukomansimbi Health Centre IV, okufuuka eddwaaliro lya disitulikiti nga kino kijja kutaasa ku bulamu bw’abantu abaabadde bafa nga tebannatuusibwa Masaka mu ddwaaliro.

Bukomansimbi erina abantu 197,568, okusinziira ku kubaala okw’ekikungo okwakolebwa mu 2024. Abawangalira mu byalo 254, emiruka 39 mu magombolola mwenda.

Mwanje yagambye nti, disitulikiti eno yaakafuna obuwumbi 13.96 erina amasomero ga gavumenti 73, ate ag’obwannannyini 99.

Pulezidenti Museveni yagambye nti, gavumenti esobodde okukola ebintu bingi mu Bukomansimbi era ku magombolola 39, asatu gokka okuli; Bukango, Butenga ne Kagologolo nayo bagenda kutuusaayo amasannyalaze.

Olukung’aana luno kwetabiddwako abakungu mu kibiina kya NRM ab’olukiiko olw’oku ntikko CEC, ababaka ba Palamenti, bannaddiini okuva mu nzikkiriza zonna, ab’eby’obuwangwa n’enkumi n’enkumi z’abawagizi ba NRM.