Amawulire
Rev.Samuel Muwonge yeebazizza abantu abawagidde omulimu gw'okuzimba ekkanisa
AKULIRA ekitongole ekibuulizi ky'enjiri mu busabadinkoni bw'e Ntebe era nga ye musumba w'obusumba bw'e Kitende, Rev Samuel Muwonge, yeebazizza abantu abafaayo ennyo okuwagira emirimu gya Mukama nga bakola emkirimu gye.
Ssabalabirizi Kazimba (ku kkono) Omulabirizi Banja (wakati) ne Rev Muwonge nga bali ku kkanisa ya St Stephen e Kitende.
By: Peter Ssaava, Journalists @New Vision
AKULIRA ekitongole ekibuulizi ky'enjiri mu busabadinkoni bw'e Ntebe era nga ye musumba w'obusumba bw'e Kitende, Rev Samuel Muwonge, yeebazizza abantu abafaayo ennyo okuwagira emirimu gya Mukama nga bakola emkirimu gye.
Rev Muwonge yagambye nti balina essanyu olw'okuba nti wakati mu nteekateeka z'okuzimba ekkanisa, ate Katonda abawereddemu omukisa ne bajaguza emyaka 70 bukya kkanisa eno etandikibwawo gye yagambye nti eyambye abantu bangi okudda eri Mukama.
Ekkanisa ya St Stephen's e Kitende eri mukuzimbibwa bwefanana
"Nga December 26, 2025 twabadde n'okusaba kw'okwebaza Katonda olw'ekkanisa yaffe okuweza emyaka 70 era ssabalabirizi w'ekkanisa ya Uganda, Dr Stephen Kazimba Mugalu n'omulabirizi w'e Namirembe Moses Banja bebaakulembeddemu okusaba." Muwonge bweyayongeddeko.
Ssabalabirizi Kazimba mukubuulira kwe, yakubirizza abakristaayo okubeera n'okukkiriza mumitima gyabwe, okusabira abo ababayigganya, okukolelera emirembe ssaako n'okulaba nga basembeza Mukama mu mitima gyabwe.
Rev Muwonge yategezezza nti mukusaba kuno, baasondeddemu ssente z'okuzimba ekkanisa era nga batunulidde okutekamu enziji n'amadirisa. Muwonge yagambye nti omulimu gw'okuzimba gugenda kukomekkerezebwa mu October wa 2026.
Yeebazizza nnyo abakristaayo abayimiridde naye okuva lwe yareeta ekirowoozo ky'okugaziya ekkanisa, era neyebaza abo bonna abawaddeyo, n'asaba Mukama abawe bye basinga okwagala mu mwaka omuggya kuba buli akola ebya Mukama, ne Mukama akola ebibye.
Ekkanisa ya St Stephen's e Kitende eri mukuzimbibwa bwefanana
Alambuludde kunteekateeka z'okumalako omwaka.
Muwonge yagambye nti kumulundi guno obusumba bw'e Kitende bwegatiddwako omubuulizi w'enjiri okuva e Nigeria, Ven Justice Okoronkwo ssaako abasumba abalala okuli Rev Daniel Balabyekubo, Rev Esmond Sserunjogi nababuulizi abalala.
Yalambuludde nti ku Mmande eno nga December 29, 2025, wategekeddwawo olukungaana lw'abakazi ku kkanisa e Kitende ate nga December 30, 2025 wabeewo olukungaana lw'abavubuka mwebagenda okukowolera mukama n'okubulirirwa.
Ku Lwokusatu nga December 30, 2025, ng'abakristaayo tebannaba kuyingira mukusaba kw'okumalako omwaka, wagenda kubaawo olusisira lw'ebyobulamu ku kkanisa e Kitende webagenda okukeberera n'okujanjaba abakristaayo endwadde ez'enjawulo
Yategezezza nti kumulundi guno omulamwa gugamba nti "Katonda yennyini, anagenda wamu naawe" ogusimbuliziddwa mu kitabo kya Okuva 33:14. Yagambye nti batunuulira nnyo okubaawo kwa mukama, obukuumi bwa mukama n'obugabirizi bwe.
Yakowodde abantu ba Katonda bonna okumalirako omwaka mukifo ekitukuvu, nagamba nti kino kiyamba nnyo omukristaayo mubulamu bwayitamu mumwaka. Yaagambye nti bagenda kusabira wamu okwebaza bye bayiseemu mu 2025 ssaako okubaako bye basaba mukama mumupya ogwa 2026.