Omuvubuka abadde yeewanise ku bbooda okuli emigugu agudde mu ttuleera n’emulinnya omutwe n’afirawo

OMUVUBUUKA abadde yeewanise ku pikipiki nga kuliko emigugu agudde mu ttuleera n’emulinnya omutwe n’afirawo nga kitwalidde poliisi ye Matugga akaseera okuggyawo omulambo.

Akabenje kano kagudde  Katalemwa ku luguudo oluva e Kampala okudda e Gulu nga omuvubuuka atomeddwa emmotoka tategeerekese mannya ge oluvannyuma ly’okusangibwa nga talina bimwogerako olw'abadduukirizze okutwala essimu ye kwe banditegedde abantu be.

Omuvubuuka ono okutuuka okugwa mu mipiira gy’emmotoka abadde yeewanise ku piki piki waggulu ng’atudde ku migugu gye nga bamuweese kyokka bw’atuuse e Katalemwa emmotoka ya lukululana n’emwekoonako ekimuviiriddeko okwekanga n’agwa mu mipiira gy’emmotoka eno emusse n’afirawo.

Akabenje kano kagguddewo mu ttuntu era okusinziira ku batuuze ababaddewo, owa piki piki omugenzi kwabadde atudde adduse buddusi olw’okutya poliisi okumukwata.

Ye Lukululana emusse bagobye ngobe nga naye tategedde nti aliko omuntu gw’atomedde n’afa engeri gy’ebadde empaavu.

Poliisi omulambo eguggyeewo ne gutwalibwa mu ggwanika ly’eddwaaliro e Mulago abasawo bagende mu maaso n’okugwekebejja.

Aduumira poliisi ye Matugga Yudaaya Mugoya asabye abantu abatuula ku miguggu waggulu okukyewala kuba ensobi ebeera ntono nnyo nebafiirwa obulamu bwaabwe.