mbagirawo okugumbululanga abantu n’embookoMinisita agumizza ab’e Buvuma ku ttaka

MINISITA omubeezi ow’ebyettaka, Dr. Sam Mayanja awadde essuubi abantu abaatwalibwa ettaka lyabwe gavumenti lye yawa yinvesita owa kkampuni ya BIDCO okusimbako ebinazi mu bizinga by’e Buvuma abamaze emyaka egisoba mu 10 nga tebasasulwanga.
Minisita eyatambudde n’abantu abenjawulo okuva mu ofiisi ez’enjawulo yakakasizza abantu baano nga bwe bajja okusasulwa ekiseera kyonna.
Mu be yatambudde nabo kwabaddeko; omumyuka w’omuyambi w’omukulembeze w’eggwanga avunaanyizibwa ku kulwanyisa obuli bw’enguzi, Rebecca Atwine, omubaka wa palamenti ow’ebyebizinga by’e Buvuma, Robert Migadde Ndugwa n’abalala ng’olukiiko lwatuuziddwa ku mbuga y’owessaza ly’e Buvuma e Maggyo.
Abatuuze baasoose kulaga bulumi bwe bayiseemu okumala ebbanga erisoba mu myaka 10 ng’ettaka lyabwe yinvesita owa BIDCO gavumenti yalimukwasa n’asenda emmere yaabwe ne basigala nga babundabunda n’abamu nga n’ekyokulya bawamma kiwamme.
Kate Clement, ku lwa ssentebe w’ekyalo ky’e Maggyo Central yategeezezza nti embeera abatuuze gye bayitamu mbi nnyo n’asaba gavumenti ebasasule. Abatuuze baasabye Minisita Mayanja abayambe basasulwe kuba abakulu bangi bazze bagenda e Buvuma nga babategeeza ensonga zaabwe naye nga tezikolebwako.
Ssentebe wa disitulikiti, Adrian Wasswa Ddungu yagambye nti ekya Gavumenti obutasasula bantu be baatwalako ettaka, bo nga abakulembeze bali ku buzibu kubanga baabaggyamu dda obwesige.
Omubaka wa Gavumenti e Buvuma, Robert Migadde Ndugwa yagambye nti ensonga eno baagiroopa ewa katikkiro w’eggwanga, Robinah Nabbanja ne mu Palamenti naye tewali kyakolebwa.
Atwine, eyavudde mu ofiisi erwanyisa obuli bw’enguzi, yategeezezza nti pulezidenti yennyini yamulagidde akwatagane ne Minisita Mayanja balabe bwe bayinza okuyamba abantu b’e Buvuma.
Minisita Mayanja yategeezezza nti Pulezidenti Museveni yalagira dda abantu b’e Buvuma okusasulwa n’ensimbi ne ziteekebwawo obuwumbi 14 ng’ekyennaku kwe kuba ng’ate abandibadde basasula abantu beebuzaabuza.
Mayanja yalagidde Minisitule y’ebyobulimi okuvaayo mangu ddala nga January 3, Pulezidenti lw’anaabeera e Buvuma ng’anoonya obululu terunnatuuka basasule abantu ku buwumbi 14 ezaawebwayo edda, n’abanaaba batasasuddwa batandike ku nteekateeka ez’okubasasula.
Ekiragiro kino kyalese abatuuze basanyufu ne beeyama nti bwe banaasasulwa, Pulezidenti Museveni baakumuyiira obululu. naye yeewuunye